پاک چین اقتصادی راہداری ڈٹ و گوادر پورٹ نا جوڑ جاڑ آن بلوچستان اٹی شونہالی بریک صدر ممنون حسین نا گورنر بلوچستان محمد خان اچکزئی تون اوڑدہی ٹی ہیت وگپ

اسلام آباد (پاکستان پوائنٹ نیوز۔26 جولائی۔2016) صدر مملکت ممنون حسین بلوچستان اٹی شونداری کاریم تیا است جمی نا درشانی ءِ کرسا پارے کہ پاک چین اقتصادی راہداری ڈٹ و گوادر پورٹ نا جوڑ جاڑ آن بلوچستان اٹی شونہالی بریک۔ داہیت ءِ او گورنر بلوچستان محمد خان اچکزئی تون سے شنبے آ ایوان صدرا ٹی اوڑدہی نا وخت آ پارے۔ گورنر بلوچستان صدر مملکت ءِ بلوچستان نا جم اٹنگا حالیت آتا بارواٹی بریفنگ ترسا پارے کہ بلوچستان اٹی امن و ایمنی نا حالیت آک گچین مسنو۔

صدر مملکت بلوچستان نا سیکورٹی نا حالیت آتیا است جمی نا درشانی ءِ کرسا پارے کہ حکومت ڈیہہ ٹی امن کن کوشست کننگ اٹی ءِ۔ صدر مملکت پارے کہ حکومت بلوچستان ءِ ایلو صوبہ غاتا بریبر ہتنگ کن گام گیج کننگ اُن۔ صدر مملکت پارے کہ پاک چین اقتصادی راہداری ڈٹ آن بلوچستان اٹی شون نا کسک ملنگرہ و ہموجاگہ نا ورناتے روزگار نا پوسکن ءُ وارخواہی رسینگک ہراڑآن اوفتا زند آتے ٹی نمان بدلی اس بریک۔