اسلام آباد(پاکستان نیوز پوائنٹ 05جنوری2016ء) اسپیکر قومی اسمبلی سردار ایاز صادق پارینے کہ مقبوضہ کشمیر اٹی کودک و معصوم کشمیری تیا انسانیت سوز بیدادی نئے بیرہ قابل مذمت ءِ بلکن آزادانہ جاست وپاست و بھارت آن وضاحت طلب کننگ نا متقاضی ءِ۔ انسانی حق انا علمبردار جہانی ادارہ غاتا کشمیری تیا بھارتی بیدادی آ چپی افسوزناک ءِ۔ پاکستان نا پارلیمنٹ اٹی کشمیری تا حق خودارادیت کن جہد اٹی اوفتا ہروڑنا اخلاقی و سیاسی مخ تفی فراوان کننگ آ کاربند ءِ۔
پنچ شنبے آ داڑے ینگ پارلیمنٹرین فور م نا کنڈآن کشمیر نا بابت اِرا دے ئی جہانی پارلیمنٹری سیمینار نا بنائی دود آن تران کرسا اوپارے کہ پاکستان نا پارلیمنٹ نا کنڈآن کشمیر نا بارواٹی جہانی پارلیمانی سیمینار اٹی غٹ شرفمند مہمان تا خیرمقدم کننگ اوڑکن اعزاز اسے۔ ای خاص کر وزیراعظم محمد نواز شریف نا منت وار اُٹ کہ او دا ویل آ اڈ ہلوک آ اِرادے ئی دیوان نا بنائی دود اٹی رونق افروز ءِ، کشمیر نا ویل یقیناوزیراعظم محمد نواز شریف نا است انا بھاز خڑک ءِ و اونا ننا نیام اٹ ساڑی گری داہیت انا غمازی ءِ کیک کہ او کشمیرنا ویل اٹی بھاز است خواہی تخک۔
اوپارے کہ ای برطانیہ، یورپی یونین و کینیڈا آن بروک آ تینا سنگت آتے کن ہم نیک است خواہی ظاہر کیوہ انتئے کہ او نیک مسخت کن مرمرانا سفر ءِ کرسا داڑے بسنو۔ داہمو مسخت ءِ ہراڑکن اسہ قوم اس تینا حق خودارادیت نا دوئی کن جہد کرسا کرینے۔ ہمو وعدہ ہرا اقوام متحدہ نا بڑزکو انگا جہانی فورم اٹ اوفتے تون کننگاسس او مسخت ہراڑکن انسانی حق انا علمبردار و محافظ آتا عین ناک نا شیف بھارتی کوزہ گرفوجی تا دوتے اٹ لکھ آ کودک کشمیری تا جان نا نذرانہ پیش کروئی تما۔
مقبوضہ کشمیر نا حالیت آتا ذکر ءِ کرسا اوپارے کہ برہان وانی نا شہیدی آن پد انتس کہ مس او انسانی حق انا ہولناک و است ءِ سرفوک آ خلاف ورزیک ءُ ، 6ہزار آن زیات کشمیری پیلٹ گن آتا نشانہ جوڑ مسنو و بھارتی فوج اسہ پوروءُ نسل اسے بینا کرینے ، دا انسانیت سوز بیدادی نئے بیرہ قابل مذمت ءِ بلکن آزادانہ جاست وپاست و بھارت آن وضاحت طلب کننگ نا جواز فراوان کیک۔
بھارت مقبوضہ کشمیر اٹی ریاستی دہشت گردی نا کمک اٹ کشمیری تا توار ءِ توننگ نا کوشست کننگ ءِ۔ دا بدقسمتی ءِ کہ کشمیری تا انسانی حق انا دُن انگا سنگین خلاف ورزی آ انسانی حق انا رکھ انا مخ تف و علمبردار آک جہانی فورم یا اقوام متحدہ ٹی بھارت نا مذمت ءِ کتوس۔ بھارت یو این ہائی کمشنر انسانی حق ، او آئی سی ، امریکی پارلیمنٹرینز یورپی یونین و آسٹریلیا نا کنڈآن مقبوضہ کشمیر اٹی آزادانہ جاست وپاست نا سوج ءِ مسترد کرے، کنا داخواہش ءِ کہ صدمہ نا گواچی کشمیر نا ویل انا اہمیت ءِ ظاہر کیو ہراکہ غٹ ڈیہہ نا رکھ و سوگوی نا حامل ءِ ۔
