اسلام آباد(پاکستان نیوز پوائنٹ 05جنوری2016ء) وزیراعظم نا سلاہکار خارجہ سرتاج عزیز جہانی برادری آ زورشاغانے کہ مقبوضہ کشمیر نا کودک و معصوم شاری تیا بھارتی بیدادی ءِ بند کرفنگ تون اوار دا ویل ءِ پرامن و سیاسی ایسر کرفنگ اٹی تینا کڑد ءِ ادا کے، پاکستان ہمیشہ کشمیری تا سیاسی، سفارتی و اخلاقی مخ تفی ءِ کرینے ہرا پین وخت اس ہم برجاء تخنگک۔
پنچ شنبے آ داڑے ینگ پارلیمنٹرین فورم نا کنڈآن کشمیر نا بابت اِرادے ئی جہانی پارلیمنٹری سیمینار نا بنائی دود آن تران کرسا اوپارے کہ اقوام متحدہ نا ایجنڈہ غا کشمیر نا ویل و فلسطین داوخت اسکان ایسرنا چاری ءُ ، دا چرجوئی ٹی سلامتی کونسل نا قراردادآک ہم ساڑی اریر۔ اوپارے کہ کشمیرنا ویل انا بابت کشمیری تا مسہ نسل آتا قربانی مچ آ دنیا نا مون آٹی ءُ، 7لکھ بھارتی فوج انا مقبوضہ کشمیر اٹی ساڑی گری و اوفتا کودک و معصوم کشمیری تیا بیدادی ءِ ہر فورم آ تالان کننگ کن پاکستان تینا کڑد ءِ ادا کننگ ءِ۔
اوپارے کہ 2جولائی 2016ء آ برہان وانی نا شہیدی کشمیری تا جہد آجوئی نا اہم موڑاس جوڑ مسنے اوکان گڈ بھارتی فوج جہد آجوئی ٹی اختہ کشمیری تیا بیدادی ءِ کاٹم آن گدریفینے۔ پیلٹ گن آتا کاریم اٹ اتنگ آن ہزار آ کشمیری ورنابینائی آن محروم مسنو و داوخت اسکان جہد آجوئی نا بابت جان تا ندرانہ ءِ پیش کننگ نا کچ مقبوضہ کشمیر اٹی ایلو ہراہم جہد آجوئی نا مقابلہ ٹی بھاز زیات ءِ۔
اوپارے کہ پاکستان و بھارت نا نیام اٹ کشمیر نا ویل اسہ بنداوی ءُ معاملہ اسے، وزیراعظم محمد نواز شریف اقوام متحدہ نا جنرل اسمبلی ٹی دا ویل ءِ پبی وڑاٹ تالان کننگانے۔ اوپارے کہ پاکستان ہمیشہ کشمیری تا حق خودارادیت نا مخ تفی ءِ کرینے نن پین وخت اس ہم کشمیری تا سیاسی ، سفارتی و اخلاقی مخ تفی ءِ برجاتخنہ۔ اوپارے کہ جہانی برادری ءِ بایدے مرے کہ کشمیر نا ویل انا سیاسی و پرامن ایسرکشنگ اٹی تینا کڑد ءِ ادا کیر۔
