ڈیرہ مراد جمالی(پاکستان نیوز پوائنٹ 02جنوری2016ء) نصیر آباد نا تحصیل چھتر نا علاقہ ٹی بارودی سرنگ نا دھماکہ غاتا اِرا جتا واقعہ غاتیٹی 10بندغ ٹھپی ہسپتال آ گدریفنگار۔ پولیس نا رداٹ نصیر آباد نا تحصیل چھتر نا علاقہ ٹی اِرا بارودی سرنگ آتا دھماکہ مس، ہڑتوم آ واقعہ غاتیٹی 10 بندغ ٹھپی مسر۔ اولیکو واقعہ عیسیٰ خان ٹیوب ویل نا خڑک ٹیکٹر بارودی سرنگ اسے تون ڈوک لگا ہرانا سوب 5بندغ حسین بخش کٹہ، غلام علی شاہ، ظاہر شاہ ، مومن شاہ ، موران ماچھی ٹھپی مسر۔
ارٹ میکو واقعہ چھتر نا علاقہ کنری نا خڑک پیش بس۔ مسافر بس ڈیرہ مراد جمالی آ بسکہ کہ کسر اٹی تخریب کار آتا کنڈآن شاغوک آ بارودی سرنگ تون ڈوک لگا۔ دھماکہ اٹ 5مسافر ٹھپی مسر، ہڑتوم آ واقعہ غاتا ٹھپی تے پولیس ڈیرہ مراد جمالی نا ہسپتال آ سرکرے ہراڑے طبی امداد آن پد مستی درمان کن ٹھپی تے لاڑکانہ نا ہسپتال آ گدریفنگا۔
