اسلام آباد(پاکستان نیوز پوائنٹ 02جنوری2016ء) مسلم لیگ (ن) نا راہشون سینیٹر لیفٹیننٹ جنرل (ر) عبدالقیوم پارینے کہ پاکستان 2016ء ٹی مشکلات آتا باوجود سیاسی، معاشی ، اقتصادی و راجی پٹ اٹی سرسہبی دوئی کرینے۔ ریڈیو پاکستان تون ہیت وگپ کرسا اوپارے کہ پاکستان مسلم لیگ (ن) نا برسراقتداربننگ نا وخت ملک دہشت گردی و توانائی تون اوار کیہی تنکی تیٹی پھسائنگوک ئس و ساڑی حکومت نا سرسہب پالیسی تا بدولت 2016ء ٹی ہندا مشکلات آتا باوجود سیاسی،معاشی ، اقتصادی و راجی پٹ اٹی لاتعداد سرسہبی دوئی مس۔
اوپارے کہ گدرینگوک آ دورتیٹی ملک توانائی تنکی ٹی پھسائنگوک ئس اونا باوجود صنعت آتے بلاتعطل بجلی فراوان کننگا و وزیراعظم محمد نواز شریف نا کوشست آتیان پوسکن آ توانائی پروجیکٹ آتے جاری کننگا ہراڑآن لوڈشیڈنگ اٹی بھلو حد اسسکان کمتی بسنے و انشاء اللہ اینخو نا سال انا ایسر اسکان لوڈشیڈنگ نا پوروی وڑاٹ مو ن ءِ توننگک۔ سینیٹر عبدالقیوم معیشت نا گچینی نا بابت ہیت کرساپارے کہ گدرینگوک آ دورتیٹی جی ڈی پی گروتھ 3ئس ہرا داسہ 4.0 آن تجاوز کرینے ، اسٹاک ایکسچینج آتے یکجا کننگ آن انڈیکس اٹی گچینی بسنے وخت اس کہ زرمبادلہ نا کوڑی ٹی ودکی مسنے ہراڑآن افراط زر آ کنٹرو ل مسنے۔
اوپارے کہ گدرینگوک آ سال تیٹی چین اتون اوار مچ آ دنیا و خاص کر روس اتون تعلقداریک گچین مسنوو 70 سالہ ملکی تاریخ اٹی اولیکو وار پاکستان ءِ پاک چین راہداری ڈٹ انا دروشم اٹ شونہالی نا سفر دوبسنے۔ جنرل عبدالقیوم پارے کہ ننے سرسہبی تتون اوار اوار تینا بے سہبی تیا ہم نظر شاغنگ نا گرج ءِ انتئے کہ بے سہبی تیا کنٹرول کننگ آن پد ہی شونداری دوئی کننگ مریک۔
2016 ء ٹی سرسہبی تا ذکر ءِ کرسا مسکوہی سفیر علی سرور نقوی پارے کہ گدر ینگوک آ سال حکومت نا گچینی خارجہ پالیسی تا سوب کشمیر نا ویل مچ آ دنیا ٹی تالان مسنے و مقبوضہ کشمیر اٹی ورناک گدرینگوک آ کیہی توآن حق خودارادیت نا ہلنگ کن جہد نا بناءِ کرینو۔ اومستی پارے کہ پاکستان نا موقف ءِ کہ مچ آ دنیا ٹی ہراڑے کہ اِرا ملک آتیٹی اختلاف رائے خننگک ہموڑے پاکستان مثبت وڑاٹ مصالحتی کڑد ادا کرسا کیک۔
