قومی اسمبلی و سینیٹ نا قائمہ کمیٹی ٹی ہندومیرج بل انا منظوری ہندوبرادری کن بھلو سرسہبی اسے، ڈاکٹر درشن

قومی اسمبلی و سینیٹ نا قائمہ کمیٹی ٹی ہندومیرج بل انا منظوری ہندوبرادری کن بھلو سرسہبی اسے، ڈاکٹر درشن

اسلام آباد(پاکستان نیوز پوائنٹ 02جنوری2016ء) پاکستان مسلم لیگ (ن) نا باسک قومی اسمبلی ڈاکٹر درشن قومی اسمبلی وسینیٹ نا قائمہ کمیٹی ٹی ہندومیرج بل انا منظوری ءِ ہندوبرادری کن اسہ بھلو سرسہبی اس گوندانے ۔ دوشنبے آ داڑے جاری بیان اٹی او پارے کہ ہندومیرج بل ءِ او بھاز خواری اٹ تیار کرسا قومی اسمبلی ٹی پیش کریسس،دابل انا منظوری آن ہندوبرادری نا متکن آ ویل آک ایسر مریرہ۔

ڈاکٹر درشن پارے کہ مسلم لیگ (ن)نا حکومت اٹی ملک اٹی غیر مسلم آتے کن ہم اسہ وڑنا پالیسی جوڑ کننگ انگ ءِ و ننا حکومت نا دا مننگ ءِ کہ ملک اٹی رہینگوک آ غٹ خلقت اسہ اکائی نا وڑءُ و غٹ ءِ اسہ وڑنا حق بایدے دوئی مرے۔ مسلم لیگی راہشون مستی پارے کہ ننا ملک وزیراعظم محمد نواز شریف نا سروکی ٹی شونداری و شونہالی نا پوسکن آ مزل آتے طے کننگ ءِ و بھاز زوت نن اسہ معاشی واک اس جوڑ مرسا مون آ برینہ۔

اوپارے کہ داوخت عمران خان کون آ سیاسی عنصر آک ننا حکومت نا دا شونداری پسندانہ سفر ءِ داغدار کننگ نا بے سہب کوشست کننگ ءُ ولے بے سہبی اوفتا مقدر مریک و پاکستانی قوم بروک آ گچین کاری تیٹی ہم مسلم لیگ(ن) ءِ ہی سرسہب کیرہ تانکہ شونداری نا دا سفر برجاسلے۔ باسک قومی اسمبلی ڈاکٹر درشن پارے کہ پاناما معاملہ غا عمران خان عدالت نا فیصلہ نا انتظار ءِ کے، عمران خان سیاست نا پن آ خیبرپختونخوا نا الس ءِ دھوکہ تننگ ءِ۔