اسلام آباد(پاکستان نیوز پوائنٹ 19دسمبر2016ء) وزیراعظم محمد نواز شریف پارینے کہ چین پاک اقتصادی راہداری و داڑتون تعلقدار پروجیکٹ ہڑتوم آ ملک آتا السی تعلقداری تا عکاس ءِ۔ اوداہیت ءِ چین نا کمیونسٹ پارٹی نا بنجائی کمیٹی نا انٹرنیشنل ڈیپارٹمنٹ نا نائب وزیر ژینگ ژیاؤسونگ تون ہیت وگپ کرسا پارے ہرا دوشنبے آ داڑے وزیراعظم ہاؤس اٹی اوڑتون اوڑدہی کریر۔
وزیراعظم پارے کہ دا ڈٹ درحقیقت ہڑتوم آ ملک آتا دوستانہ تعلقداری تے ٹھوس معاشی شریداری ٹی بدل کرینے۔ وزیراعظم اوفتے پارے کہ چائنا پاکستان اکنامک کوریڈور نا رداٹ کیہی پروجیکٹ آتیا کاریم کروک آ چینی ایلم تا رکھ ءِ باوری جوڑ کننگ کن 15ہزار کارندہ غاتیا تالان ملٹری و سویلین آرمڈ فورس آتا اسہ خصوصی سیکورٹی ڈویژن اس جوڑ کننگانے۔ وزیراعظم چین نا نائب وزیر نا دورہ پاکستان نا خیرمقدم ءِ کرسا پارے کہ پاکستان و چین خڑکی دوست، پڑوسی و پارٹنر ءُ۔
او آزادانہ واپاری معاہدہ نا فائدہ غاتے تالان کرے ہرا ودوک آ ہڑتوم آ کنڈآتا واپار اٹی واضح ءِ۔ واپاری کچ داسال 18 ارب ڈالر آن زیات مسنے۔ وزیراعظم پارے کہ چین وپاکستان نا نیام اٹ زبردست واپاری لائخی آن ہڑتوم آ ملک آتا ہڑتوم آ کنڈآتا واپاری کچ اٹی پین ودکی مریک۔ اوپارے کہ پاکستان بے پرخ ہرڈول نا دہشت گردی نا چٹفنگ نا عزم کرینے و دہشت گرد آتا برخلاف جاری فوجی آپریشن نا بھاز گچین نتیجہ پیش تمانے۔
اوپارے کہ دہشت گردی و انتہاء پسندی نا برخلاف جنگ ءِ اونا ایسری انجام اسکان سرکننگک و دہشت گرد آتامخ و نیٹ ورک ءِ مست آن پرغنگانے۔ اواومیت ظاہر کرے کہ ژینگ ژیاؤسونگ نا دورہ آن ہڑتوم آ ملک آتا نیام اٹ پرتپاک تعلقداریک پین سوگو مریرہ۔ داوخت آ ژینگ ژیاؤ سونگ پارے کہ وزیراعظم پاکستان نا پن چین نا ہر اُراٹی ہلنگک۔ پاکستان نا ساڑی آ حکومت نا دور اٹی پاکستان و چین نا سنگتی اسہ پوسکن ءُ دور اسے ٹی پترینگانے۔
اوپارے کہ نن چائنا پاکستان اکنامک کوریڈور نا رداٹ کیہی پروجیکٹ خاص کر پنجاب اٹی ڈٹ آتیا بھاز است جم اُن ہرافتیا کاریم ترندی اٹ جاری ءِ۔ چین نانائب وزیر پارے کہ ہڑتوم آ ملک آتا نیام اٹ ترندی اٹ ودوک آ تعلقداری تتون کمیونسٹ پارٹی آف چائنا و پاکستان مسلم لیگ ن نا نیام اٹ تعلقداری تیٹی ہم ترندی اٹ ودکی مننگ ءِ۔ اوپارے کہ چین نا شونداری ٹی کمیونسٹ پارٹی نا کڑد بھاز اہم ءِ کمیونسٹ پارٹی نا باسک آتا ساڑی کچ 8.9 ملین ءِ و پارٹی ڈسپلن آ سختی اٹ عمل کننگک۔ اوپارے کہ نن بروک آسال پاکستان مسلم لیگ نا ڈل انا دورہ چین نا چاری اُن۔ اوپارے کہ ننے خوشی مریک کہ ڈل اٹی وزیراعظم نا صاحبزادی مریم نواز شریف ہم اوار مرے۔
