اسلام آباد(پاکستان نیوز پوائنٹ 15دسمبر2016ء) قومی احتساب بیورو(نیب) 840کنال ڈغارتا ہلنگ اٹی بدعنوانی سکینڈل اٹی اوار این آئی بی بینک انا منیجر تحسین اللہ و ڈغار نا مالک غلام رسول ءِ دزگیر کرینو۔ دوبہ دارآتیا موضع ساہی بالا ضلع پشاور اٹی ورکرزویلفیئر بورڈ اکن لیبر کمپلیکس نا جوڑ جاڑ کن 840 کنال ڈغار نا ہلنگ اٹی بدعنوانی کک بیکس و کمیشن وصولی نا دوبہ ءِ۔
نیب ءِ انکوائری نا وخت سماتماکہ دوبہ دار تحسین اللہ این آئی بی بینک انا برانچ شوباچوک پشاور اٹی 2012-13ء نا وخت ریلیشن شپ منیجر و برانچ منیجر مسنے، دوبہ دار ایلو دوبہ دارآتون اواری اٹ بدعنوانی نا پیسہ جمع کننگ کن جعلی اکاؤنٹ ملا وخت اس کہ دوبہ دار ایلو دوبہ دار آتے رشوت و کک بیکس آن دوئی کروک آ زرانا رکھوک گدریفنگ اٹی ہم کمکاری کرے۔ رشوت و کک بیکس آن دوئی کروک آ زردا جعلی اکاؤنٹ آتیٹی گدریفنگا۔
دوبہ دار تحسین اللہ نا کمکاری آن ابن امین، سلیم خان و میاں فضل سبحان ناپن تیا ملوک آ اکاؤنٹس زرڈھکنگ کن کاریم اٹ اتنگار۔ ڈغار مالکان دوبہ دار غلام رسول و اعجاز حسین دوبہ دار ورکرز ویلفیئر بورڈ و محکمہ ریونیو نا افسران، مختار کار و حیدر علی خان آن موضع شاہی بالا پشاور اٹی تینا ڈغار نا گدریفنگ نا اودیم ڈیل کرسا غیر کانودی وڑاٹ زردوئی کرسا قومی خزانہ ءِ نسخان رسیفے۔
منیجر این آئی بی بینک سٹی برانچ پشاور دوبہ دار تحسین اللہ ورکرز ویلفیئر بورڈ پشاور نا کمامدار و ایلو فتا گڑاتا ہلنگ نا مقدمہ ٹی بدعنوانی نا دوبہ غاتیا مست آن دزگیر ءِ۔ دوبہ دار آک کیہی فرم آتا پن آ جعلی اکاؤنٹ جوڑ کریر وخت اس کہ ورکرز ویلفیئر بورڈ پشاور نا غیر کانودی ٹھیکہ غاتیان دوئی کروک آ زر، کک بیکس و سرکاری فنڈ دا جعلی اکاؤنٹ آتیٹی گدریفنگار۔
