اسلام آباد(پاکستان نیوز پوائنٹ 9دسمبر2016ء) امریکی سینیٹ نا خارجہ امور کمیٹی ڈیہہ ٹی امن و سلامتی ءِ مون آ دننگ اٹی پاکستان نا کڑد ءِ امنا کرسا پاکستان تون ہڑتوم آ کنڈآتا تعلقداری تے سوگو کننگ نا خواہش نا درشانی ءِ کرینو ۔ جمعہ آ دفترخارجہ نا ترجمان نا رداٹ وزیراعظم نا خصوصی کمکار طارق فاطمی کیپٹل ہل واشنگٹن اٹی چیئراٹی سینیٹر باب کروکررو رینکینگ باسک سینیٹر بن کارڈین تون اوڑدہی نا وخت پاکستان کن امداد و مخ تفی آ سینیٹ نا خارجہ امور کمیٹی نا منت واری ءِ ادا کرے۔
طارق فاطمی انسداد دہشت گردی نا چرجوئی ٹی کمکاری نا فراوانی نا بابت موکل تننگ آ امریکی کانگریس نا کڑدانا ستاءِ کرے ہرا پاکستان کن فاٹا ٹی دہشت گردآتا نیٹ ورک نا چٹفنگ و ڈیہہ ٹی امن و سوگوی نا مون آ دننگ اٹی کمکار جوڑ مس۔ طارق فاطمی امریکی سینیٹ نا خارجہ امور کمیٹی ءِ بھارتی فورس آتا کنڈآن مقبوضہ کشمیر اٹی بھلو کچ اسے آ انسانی حق انا خلاف ورزی و کنٹرول لین آ بھارت نا اشتعال انگیز کارروائی تیان ہم معلومدار کرے۔
اوبھارت نا بیدادی و ہٹ دھرمی نا سوب سویلی ایشیاٹی امن نا گمان آتیا ودوک آ منفی زئم آتا بارواٹی امریکی سینیٹ نا خارجہ تعلقداری کمیٹی ءِ بریفنگ تس۔ خصوصی کمکار سینیٹرز آتے پاکستان نا کنڈآن مسکوہی مسہ سال انا وخت ملک اٹی معیشت و سیکورٹی ءِ گچین جوڑ کننگ کن کروک آ گام گیج آتا بارواٹی ہم پارے۔
