اسلام آباد(پاکستان نیوز پوائنٹ 16نومبر2016ء) الیکشن کمیشن عمران خان و جہانگیر ترین نا نابودی نا ریفرنس نا سماعت ءِ 22نومبر اسکان ملتوی کرسا اوفتے آن ورندی طلب کرینے۔ چارشنبے آ الیکشن کمیشن اٹی چیف الیکشن کمشنر جسٹس (ر) سردار رضا خان نا سروکی ٹی بینچ تحریک انصاف نا سروک عمران خان نا برخلاف مسلم لیگ (ن) نا راہشون طلال چوہدری و ایلوفتا کنڈآن دائر ریفرنس نا سماعت ءِ کرے۔
عمران خان نا کنڈآن اونا وکیل بینچ انا مون آ پیش مس ہراورندی کن پین مہلت خوائس ہراڑآ اودے 22نومبر اسکان ورندی داخل کننگ نا مہلت تننگا۔ ہنداوڑ تحریک انصاف نا راہشون جہانگیر ترین نا برخلاف محمد خان ڈاہا و ایلوفتا کنڈآن قومی اسمبلی نا رکنیت آن نابودی نا ریفرنس نا سماعت مس۔ جہانگیر ترین نا وکیل پارے کہ اونا موکل نا برخلاف ریفرنس دائر کروک آ درخواست گذار آک داڑے ساڑی افس ہراڑآن ثابت مریک کہ اوفتا دا کیس اٹی دلچسپی اف ہنداخاطران اودے خارج کننگے ہراڑآ چیف الیکشن کمشنر پارے کہ تدوک آ پیشی آ ہم درخواست گذار ساڑی ہلو۔
داڑآ بینچ اوفتے نوٹس جاری کرسا سماعت ءِ 22نومبر اسکان ملتوی کرے۔ الیکشن کمیشن اٹی کیپٹن (ر) محمد صفدر نا برخلاف درخواست نا سماعت ہم 22نومبر اسکان ملتوی کننگا۔
