خیر پور ٹامیوالی(پاکستان نیوز پوائنٹ 16نومبر2016ء) وزیراعظم محمد نواز شریف پارینے کہ پاکستان نا دفاع ناقابل تسخیر ءِ، ہر بیدادی نا پبی ورندی ءِ تننگک، کشمیر نا ویل انا سنجیدگی اٹ ایسری المی ءِ سی پیک پاکستان و چین نا گچین کمکاری نا مظہر ءِ۔ چارشنبے آ داڑے پاک فوج و پاک فضائیہ نا اسیجائی فوجی مشق آتا وخت آ دود آن تران کرسا اوپارے کہ فوجی مشق آک داہیت انا مظہر ءُ کہ سلہہ بندفوج ہر بیدادی تون مون تننگ کن پوروی وڑاٹ تیار ءِ۔
وزیراعظم پارے کہ فوجی مشق آتے ہرسا بھاز خوشی مس۔ اوپارے کہ آپریشن ضرب عضب دہشت گردی نا برخلاف دنیا نا غٹ آن زیات موثر آپریشن ءِ۔ دہشت گردی نا برخلاف جنگ اٹی سلہہ بند فوج انا قربانی تے قدرانا نظر اٹ ہرنہ۔ آپریشن ضرب عضب نا سوب حکومت نا رٹ بحال مسنے۔ وزیراعظم پارے کہ دشمنک پاکستان اٹی شونداری نا عمل ءِ ہُننگ خواپسہ و دہشت گرد آک ملک ءِ نزوری نا گواچی کننگ خوارہ۔
وزیراعظم پارے کہ داہیت افسوزنا قابل ءِ کہ سویلی ایشیاء تنازعہ غاتیٹی تموک ءِ و کشمیر نا ویل انا سنجیدگی اٹ ایسری المی ءِ، کشمیر نا ویل ءِ کشمیری تا است خواہی و سلامتی کونسل ناقرارداد آتا رداٹ ایسر کننگے، فائر بندی نا معاہدہ نا خلاف ورزیک تشویشناک ءُ۔ وزیراعظم پارے کہ پاکستان نا آخبت روشناءِ، ملک انا درجہ بندی ٹی ودکی مسنے و جہانی ادارہ غاک پاکستان نا معاشی شون نا اعتراف ءِ کننگ ءُ ، نناسلہہ بند فوج تینا کاریم نا کچ انا سوب دنیا نا گچین فوج آتیٹی اوار ءِ۔
اوپارے کہ نن اسہ ایلو نا معاملہ غاتیٹی عدم مداخلت نا پالیسی آ عمل کننگ اُن۔ وزیراعظم پارے کہ پاک چین اقتصادی راہداری نا ڈٹ پوروی وڑاٹ فعال مننگ والاءِ، سی پیک پاکستان و چین نا گچین کمکاری نا مظہر ءِ، سی پیک نا رداٹ غٹ ڈٹ آتا بروخت پوروی ءِ باوری جوڑ کننگ انگ ءِ و اونا رداٹ گوادر بندرگاہ آن اولیکو واپاری جہاز رادہ مسنے۔
