اسلام آباد(پاکستان نیوز پوائنٹ 14نومبر2016ء) صدر مملکت ممنون حسین بھارتی فوج انا بلااشتعال سم کاری ٹی فوجی ورناتا شہیدی آ بے کچ ڈکھ و افسوزنا درشانی ءِ کرسا پارینے کہ پاکستان ڈیہہ ٹی امن نا خواہندار ءِ و او اسہ ملک اسے تون ہم جنگ خواپک ولے اگہ بیدادی مس تو اونا پبی ورندی ءِ تننگک، ننا سلہہ بند فوج پوروی اٹ چوکس ءِ، و اودُن انگا بیدادی نا پبی ورندی تننگ نا لائخی تخک۔
دوشنبے آ ایوان صدر نا کنڈآن جاری بیان اٹی او شہید مروک آ فوجی ورناتے خراج عقیدت پیش کرسا پارے کہ اوفتا قربانیک گم مفسہ۔ صدر مملکت پارے کہ بھارتی فوج پدریسہ سیم تا خلاف ورزی ءِ کننگ ءِ۔ صدر مملکت پارے کہ بھارت نا کنڈآن لین آف کنٹرول آ بلااشتعال سم کاری نا مسخت مقبوضہ کشمیر آن توجوہ ءِ اسہ پلو کننگ نا بے سہب کوشست اسے ہراڑے ہردے بے گناہ کشمیری تے شہید کننگ انگ ءِ ہرافتے ٹی چنا، ورنا، بزرگ و نیاڑیک اوار ءُ۔
صدر مملکت پارے کہ مقبوضہ کشمیر اٹی جاری بیدادی نا مثال مچ آ دنیا ٹی ملیپک۔ صدر مملکت پارے کہ پاکستان سفارتی محاذ آ کشمیر نا ویل ءِ پبی وڑاٹ چست کرینے ہراڑآن بھارت نا سبکی مسنے و اونا مقبوضہ کشمیر اٹی اصل دروشم مون آ بسنے۔ اوپارے کہ بھارت داسہ اوچھے ہتھکنڈہ غاتا کمک اٹ بین الاقوامی برادری نا توجوہ ءِ اسہ پلو کننگ خواہک ہراٹی او سرسہب مننگ کپک۔
