اسلام آباد (پاکستان پوائنٹ نیوز۔20 جولائی۔2016) کل جماعتی حریت کانفرنس نا کسرشون سید یوسف نسیم پارینے کہ برہان وانی نا شہیدی کشمیری جہد ءِ پوسکن ءُ رنگ اس تسنے ، کشمیریک تینا حق خودارادیت ءِ دوئی کرسا سلرہ۔ چارشنبے آ پاکستان ٹیلی ویژن تون ہیت وگپ کرسا اوپارے کہ کشمیریک تینا حق خودارادیت نا دوئی کن پدریسہ جہد کننگ ءُ، پاکستان جوڑ مننگ آن26دے مست ہی کشمیری تا 93درسد اکثریت دافیصلہ کرے کہ نن پاکستان تون رہینگ انگ خوانہ، اوپارے کہ پاکستان ہمیش تینا کشمیری ایلم تے تون تفوک ءِ و چارشنبے آ ہم مچ آ ملک اٹی یوم سیاہ اڈتننگا ہراٹی کشمیری تے تون پورو یکجہتی نا درشانی و بھارت نا برخلاف شدید برانز کننگا۔
اوپارے کہ جہد آجوئی کن کشمیریک ہمیش ہمو کسر ءِ ہلکر ہرا جہانی برادری کن قابل قبول مرے، اقوام متحدہ کشمیری الس تون وعدہ کریسس کہ کشمیر نا ویل ءِ کشمیری تا است خواہی نا رداٹ ایسر کننگک و کشمیری تے اینو اسکان او وعدہ نا پوروی نا انتظار ءِ۔ نن کشمیر نا ویل انا اقوام متحدہ نا قرارداد و کشمیری الس نا است خواہی تا رداٹ ایسر مننگ نا خواہش مند اُن۔
اوپارے کہ مسکوہی ٹی پاک بھارت حکومت آک ہم داہیت آ متفق ئسر کہ کشمیر اسہ متنازعہ ویل اسے ہرادے مذاکرات نا کمک اٹ ایسر کروئی مرے واہم بھارت ہر وار داوعدہ غان انحراف کرے ۔ بھارت نہ تو دا ویل آ مذاکرات نا میز آ بریک و نہ ہی اودے اقوام متحدہ نا قرارداد آتا رداٹ ایسر کننگ کن تیار ءِ ہنداخاطران اقوام متحدہ ءِ مرے کہ او کشمیر ناویل ءِ تینا قرارداد آتارداٹ ایسر کرفے و کودک کشمیری تیا بھارتی فوج انا ظلم و بربریت ءِ تورفے۔
یوسف نسیم پارے کہ بھارت دا تحریک ءِ چٹفنگ خواہک و دا مسخت کن کشمیر اٹی واک ءِ کاریم اٹ ہتنگ ءِ و 7لکھ آن زیات فوج مقبوضہ کشمیر اٹی تعینات کرینے ہرا کودک کشمیری تیا ظلم انا مش اس پرغنگ ءُ۔ اوپارے کہ بھارت تینے اسہ بھلو جمہوری ملک اس ظاہر کیک ولے ہموڑے اقلیت آتے او ہند دوئی اف ہرا بڑزانا ذات انا ہندوتے دوئی ءِ۔ ہنداسوب ءِ کہ بھارت اٹی بی جے پی نا ساڑی آ حکومت نا برسراقتدار بننگ تون ہی بھارت نا کیہی اہم شخصیت آک تینا اعزاز آتے پدی تسوسر۔
