اسلام آباد (پاکستان پوائنٹ نیوز۔20 جولائی۔2016) مسکوہی سفیر پاکستان جاوید حفیظ پارینے کہ کشمیری الس تینا حق خودارادیت و آجوئی کن جنگ کننگ ءُ۔ برہان وانی نا بھارتی فوج انا دوتے اٹ شہیدی داتحریک ءِ پوسکن ءُ زند اس تسنے ۔ تدوک آ10دے آن مقبوضہ وادی ٹی پوروی وڑاٹ کرفیو خلوک ءِ ہرانا سوب آن چناک ، پیر انگاک و نیاڑیک اُراتے ٹی محصور مرساسلیسونو۔
چارشنبے آ پاکستانی ٹیلی ویژن تون ہیت وگپ کرسا اوپارے کہ مقبوضہ کشمیر اٹی بھارتی ریاستی دہشت گردی ٹی دے پہ دے ودکی مرسا کننگ ءِ ہرا گڑتی نا سوب ءِ۔ جہانی برادری تون اوار انسانی حق انا تنظیم آتے دا نا نوٹس ءِ ہلوئی مرے۔ اوپارے کہ مچ آ دنیاٹی پاکستانی سفارتی مشن تینا کاریم ءِ برجاتخانے و کشمیر نا ویل ءِ ہر جہانی فورم آ تالان کننگ انگ ءِ۔
اوپارے کہ کشمیریک تینا آجوئی نا پرامن تحریک ءِ برجاتخانو وخت اس کہ بھارت کودک کشمیری تیا ظلم و بربریت نا انتہاءِ کننگ ءِ۔ مسکوہی سفیر پارے کہ مسکوہی ٹی پنڈت جواہر لال نہرو پاریسس کہ او کشمیر نا ویل ءِ رائے شماری نا ذریعہ ایسر کرفینہ واہم دُن مننگ کتو ، داسا برہان وانی نا شہیدی مچ آ دنیا نا انسان ضمیر ءِ بش کرینے و کشمیر نا ویل اسہ وار ولدا جہانی کہول آ تالان مسنے۔ اسہ سوج اسینا ورندی ٹی جاوید حفیظ نا پاننگ ئس کہ اینو پگہ سوشل میڈیا بھاز متحرک ءِ ، ورناتے مرے کہ او دا جہد ءِ سوشل میڈیا آ ہم پبی وڑاٹ تالان کیر۔
