اسلام آباد(پاکستان نیوز پوائنٹ 8نومبر2016ء) پاکستان و ترکی نا نیام اٹ آزادانہ واپار نا معاہدہ (ایف ٹی اے) آن پاکستان نا برآمدات آتے 5ارب ڈالر سالانہ اسکان ودفنگ مریک۔ پاکستان بزنس کونسل نا پٹ وپولی رپورٹ نا رداٹ پاکستان و ترکی نا نیام اٹ آزادانہ واپار نا معاہدہ غا اینخو سال انا ایسر اسکان دستخط کننگک ہراڑآن ملکی برآمدات آتا مون آ دننگ اٹی کمک رسینگک۔
ہڑتوم آ ملک آتا تین پہ تینی واپارنا ساڑی آ کچ اونا کچ آن بھاز کم ءِ و پاکستان ترکی پمبہ و پچ انا مصنوعات برآمد کننگ ءِ وخت اس کہ ترکی آن مشینری ، بجلی نا ازباب، پلاسٹک ، کیمیکلز ، آئرن و اسٹیل تون اوار ایلو کیہی مصنوعات درآمد کیک۔ رپورٹ نا رداٹ معاہدہ آن پاکستان نا برآمدات آتے ودفنگ اٹی کمک رسینگک۔ پاکستان نا مقابلہ ٹی ترکی نا برآمدات آتیٹی 2.5گنا اسکان ودکی نا اومیت ءِ۔
داوخت آ ترکی ءِ کروک آ برآمدات آتا کچ 329ملین ڈالر نا خڑک ءِ ہرادے 5ارب ڈالر اسکان ودیکی تننگ مریک وخت اس کہ ترکی نا برآمدات آتیٹی 12.8ارب ڈالر نا ودکی نا گمان ارے داوخت پاکستان ترکی آن 346ملین ڈالر نا درآمدات کیک۔ رپورٹ نا رداٹ ایف ٹی اے آن پاکستان نا ترکی ءِ برآمدات آتیٹی 22درسد آن زیات ودکی مریک۔ پاک ترک ہڑتوم آ کنڈآتا واپار اٹی ودکی کن رپورٹ اٹی سلاہ پیش کننگانے کہ دا چرجوئی ٹی واپاری اڑاند آتا چٹفنگ و خراج آتا ساڑی آ کچ ءِ کم کننگ آ توجوہ تننگ نا گرج ءِ۔
