اقتصادی راہداری ڈٹ انا پوروی آن بلوچستان ، سندھ، خیبر پختونخواہ و پنجاب نا الس مستفید مریرہ، عمر ایوب

اقتصادی راہداری ڈٹ انا پوروی آن بلوچستان ، سندھ، خیبر پختونخواہ و پنجاب نا الس مستفید مریرہ، عمر ایوب

اسلام آباد(پاکستان نیوز پوائنٹ 8نومبر2016ء) پاکستان مسلم لیگ (ن) نا راہشون عمر ایوب پارینے کہ پاک چین اقتصادی راہداری ڈٹ انا پوروی آن بلوچستان، سندھ ، خیبرپختونخوا و پنجاب نا الس مستفید مریک۔ تدوک آ دے ریڈیو پاکستان تون ہیت و گپ کرسا اوپارے کہ پاکستان نا شون اٹی پاک چین اقتصادی راہداری ڈٹ آن مست فیلڈ مارشل ایوب خان امریکہ نا مخالفت ءِ باوجود قراقرم ہائی وے جوڑ جاڑ کرسا پاک چین سنگتی ءِ بے مثال جوڑ کرے ولے ساڑی آ حکومت نا گچین پالیسی تیان پاک چین اقتصادی راہداری ڈٹ انا بناء کننگانے ہرانا پوروی آن پاکستان تون اوار ڈیہہ نا قسمت بدل مریک ۔

اوپارے کہ دا ڈٹ اتون ذیلی ڈٹ آتیٹی روڈ، ریلوے ٹریک و موٹروے جوڑجاڑ کننگک ہراڑآن روزگار نا وارخواہی ودی مریک۔ عمر ایوب پارے کہ چین افریقہ ٹی معدنیات و انفراسٹرکچر نا مد اٹی 6سد ارب ڈالر آن زیات نا زرکاری کننگ ءِ و دا معدنیات آتے پاکستان نا کمک اٹ چین آ دیک۔ گوادر آن 50کنٹینر آتا اولیکو کھیپ چین آ رادہ مننگ نا بابت چست کروک آ سوج انا ورندی ءِ ترسا اوپارے کہ کنٹینر آتا اولیکو کھیپ چین آ رادہ مننگ خوش آئند ءِ ولے بروک آ دے تیٹی چین نا مال بردار بحری جہاز گوادر اٹی لنگرانداز مننگ والاءِ ہراٹی 20فٹ انا 18ہزار کنٹینر ءُ ، داکنٹینر آتا لین اس خلنگے تو 70آن 75میل مریس مرغن ٹرین اس جوڑ مریک ۔

عمر ایوب پارے کہ چین آن ہر تو اگہ مسہ مال بردار بحری جہاز گوادر پورٹ آ لنگر اندازمریر تو 50ہزار آن زیات کنٹینر روڈ آتیا راہی روان مریرہ ہراڑآن مچ آ ملک اٹی شونہالی بریک ۔