اسلام آباد(پاکستان نیوز پوائنٹ 7نومبر2016ء) وزیر مملکت اطلاعات ونشریات مریم اورنگزیب پارینے کہ داسہ دوبہ، بد تہذیبی و دروغ انا دیک چٹانو، داسہ وخت دوبہ غاتا آخا ثبوت پیش کننگ نا ءِ، عدالت ثبوت خوائس تو پی ٹی آئی نا وکیل فراوان کتو، مخالفین آک صرف دوبہ خلیرہ داسہ ثبوت تننگ نا وخت شروع مسنے و پی ٹی آئی نا نرنگ نا وخت بسنے۔ دوشنبے آ اسلام آباد اٹی میڈیا تون ہیت وگپ کرسا اوپی ٹی آئی ءِ مخاطب کرسا پارے کہ دا عدالت ءِ کنٹینر اف ، داکان ہچ گہس نرنگ کپک۔
اوپارے کہ وزیراعظم جاست وپاست کن سپریم کورٹ ءِ چھٹی اس نوشتہ کریسس۔ ننا وکیل آک ہردوبہ نا سرجم ورندی ءِ جمع کرفینو۔ اوپارے کہ ننا کیس اولیکو دے آن سوگو ئس و نن عمران خان نا دورغ نا دوبہ غاتا دفاع کننگ کن تیار اُن۔ اوپارے کہ عدالت عظمیٰ نا شرف غٹ آ المی ءِ۔ اوپارے کہ پاناما کیس انا بابت پاکستان تحریک انصاف ثبوت پیش کننگ اٹی بے سہب مسنے، دروغ تڑسا تڑسا قیاس آرائی کننگ انگ ءِ و ہراتم ثبوت پیش کننگ نا واری بریک تو ثبوت آتے پیش کننگپک۔
اومیڈیا آن خواست کرسا پارے کہ او زمواری نا ثبوت ءِ ترسا رپورٹنگ کیر انتئے کہ عمران خان تون اوار ایلو راہشونک میڈیا نا مون آ ہموہیت آتے کیرہ ہرافتا عدالت نا تہٹی ہچ ءُ ذکر اس مفک و نہ ہی اوفتا راستکی تون تعلق اس مریک۔ اومیڈیا نمائندہ غاتون پارے کہ عدالت عظمیٰ نا ریمارکس نا بابت رپورٹنگ اٹی زمواری نا ثبوت ءِ تننگے۔ اودااومیت نا درشانی ءِ کرے کہ وزیراعظم محمد نواز شریف سرخرو مریک ۔
