اسلام آباد(پاکستان نیوز پوائنٹ 7نومبر2016ء) قومی احتساب بیورو(نیب) نا چیئرمین قمر زمان چوہدری سرکاری دورہ غا چین آ رادہ مسنے۔ اودے چین انا وزیر سپرویژن اینڈ انسپکشن ہوآنگ شکشیان دورہ نا سلہ خلکونے۔ چیئرمین نیب انا چین اٹی اڈکننگ نا وخت ہڑتوم آ ملک آک بدعنوانی نا چٹفنگ آن بابت معاملہ غاتیٹی کمکاری کن مفاہمت نا یات داشت آتیا دستخط کیرہ۔
دا مفاہمتی یات داشت چین و پاکستان نا نیام اٹ ودوک آ اقتصادی و واپاری کمکاری نا تناظر اٹی بے کچ اہمیت تخرہ و ہڑتوم آ ملک آتا حکومت آتا شفاف و بدعنوانی آن پاک چاگڑد نا فراوانی ناعزم انا اعادہ ءِ کیرہ۔ چین آ رادہ مننگ نا وخت آ ہیت وگپ کرسا چیئرمین نیب پارے کہ چین پاکستان نا آزموندہ سنگت ءِ، پاکستان چین اتون تینا تعلقداری تے بے کچ اہمیت ایتک و ہڑتوم آ ملک آتا نیام اٹ سریس وختی تعلقداری تے تین پہ تینی مخ تفی دوئی ءِ۔ اواومیت ظاہر کرے کہ ہڑتوم آ سنگت ملک آتا نیام اٹ انسداد بدعنوانی کن کمکاری ءِ پین مون آ دننگ رسینگک۔
