اسلام آباد(پاکستان نیوز پوائنٹ 3 نومبر2016ء) وزیر دفاع خواجہ آصف پارینے کہ مخالفین آتا برانز و دھرنہ غاتا باوجود حکومت تینا مدت ءِ پورو کیک۔ پنچ شنبے آ سپریم کورٹ نا پیشن میڈیا تون ہیت وگپ کرسا اوپارے کہ مخالفین آتا شور کننگ نا باوجود پاکستان مسلم لیگ (ن) نا حکومت مسہ سال آن زیات نا وخت ءِ گدریفینے، حکومت ءِ ہچ اس متنے، حکومت ہچ ءُ جاگہ اس انتنے نہ جاگہ اس کاہک۔
السی خذمت نا چرجوئی برجاء سلک۔ خواجہ آصف نا پاننگ ئس کہ (ن) لیگ والاک خواری نا کٹیا غا یخین تخرہ قبر آتا کٹیا ءِ کنپسہ، اوپارے کہ لیڈر ہراکہ مکتبہ فکر آن تعلق تخے تینا کارندہ غاتون سلک، اُراٹی پش اپس خلوک آک آخا بلکن مون آ بروک آلٹ کنوک آک لیڈر مریرہ۔ ورکنگ باؤنڈری آ بھارتی بیدادی نا بابت چست کروک آ سوج انا ورندی ءِ ترسا اوپارے کہ وزیراعظم نا پارت آ سیالکوٹ و نارروال نا شش باسک قومی اسمبلی آ تالان کمیٹی زہمی علاقہ غاتیٹی نسخان تا تخمینہ ءِ خلیرہ و اُراتے ہلوک آتا ہنکین و کُننگ نا بست و بند ءِ کیرہ۔ اومستی پارے کہ وزیراعظم محمد نواز شریف وزیر امور کشمیر وزیر برجیس طاہر ءِ ہم پارت کرینے کہ کنٹرول لین آ بھارتی بیدادی آن مروک آ نسخان آتا اندازہ ءِ خلنگے۔
