وزیراعلیٰ بلوچستان نا سلاہکار ثانوی تعلیم حاجی محمد خان لہڑی ناگپ و تران

کوئٹہ (پاکستان پوائنٹ نیوز 30 نومبر 2018ء) وزیراعلیٰ بلوچستان نا سلاہکار ثانوی تعلیم حاجی محمد خان لہڑی پارینے کہ آب اٹنگا تعلیم نا مون آ دننگ و خواندگی نا کچ اٹی ودکی کن استاد آتا تربیت پوسکن آ وڑوڈول آتیا المی ءِ، ہژدہ می ترمیم آن پد نصاب نا جوڑ کننگ وترتیب صوبہ غاتون ءِ ولے دا ہیت گڑتی نا سوب ءِ کہ بلوچستان اٹی 2006 ء نا نصاب رائج ءِ و اودے پوسکن آ دور انا گرج آتے اٹ ہم گرنچ کننگ کن خاطر خواہ گام گیج چست کننگتنے، پوسکن آ تعلیمی پٹ وپول آ مبنی نصاب نا جوڑ کننگ کن دمدستی گام گیج چست کننگے، داہیت ءِ او صوبائی ادارہ تعلیم اساتذہ(پائیٹ) نا دورہ ٹی ہیت وگپ کرسا کرے، داوخت آ ڈائریکٹر پائیٹ ظفر یاسین سلاہکار تعلیم بلوچستان ءِ ادارہ نا کارکڑد و آخبت نا تربیتی پروگرام نا بابت معلومدار کرے، سلاہکار تعلیم بلوچستان حاجی میر محمد خان لہڑی پارے کہ بلوچستان اٹی تعلیمی شونداری کن پک کروک ہدف آتا دوئی کننگ کن غٹ اسٹیک ہولڈر آتے تینا زمواری تے پورو کروئی مریک گڑاس جہانی ادارہ غاتا سروے رپورٹ اٹی بلوچستان نا استاد آتا گیشتری نا کسبی کچ ءِ است جم گوندنگتنے و داحالیت نا ازالہ ءِ کننگ کن ہندن ءُ جامع تربیتی پروگرام مرتب کننگ نا گرج ءِ ہراڑان استاد آتا کسبی کچ و لائخی تیٹی گچینی بننگ کے او پائیٹ نا تربیتی پروگرام تے جہانی آب انا رداٹ شاغنگ کن پوسکن آ تعلیمی پٹ وپول کن معیاری ادارہ غاتون رابطہ کاری نا گرج آ زور شاغا۔