کوئٹہ(پاکستان نیوز پوائنٹ 22ستمبر 2016ء) براہوئی ادبی سوسائٹی نا اسہ دیوان اس چیئرمین عبدالقیوم بیدار نا کماشی ٹی مس ہراٹی بلوچستان نا پنی دانشور، ادیب و ماہر تعلیم میر عبداللہ جان جمالدینی و اونا اُرائی نا کذیت آ ڈکھ و غم نا درشانی کننگا۔ داوخت آ ترانکار آک پاریر کہ میر عبداللہ جان جمالدینی بلوچستان اٹی علم و ادب نا شون و بلوچی، پشتوو براہوئی زبان تے یونیورسٹی نا کہول آ کلاس آتا اجراء کن جہد کرے۔
دا او بزرگ آتا جہد نا بھرم ءِ کہ اینو بلوچستان یونیورسٹی ٹی ایم فل و پی ایچ ڈی نا کہول آ کلاس آک مننگ ءُ۔ اواسہ ادبی سرکل اس جوڑ کرسا علم و ادب نا آبیاری کرے داسرکل اٹی بلوچستان نا پنی ادبی و سیاسی شخصیت ہرافتے ٹی میر گل خان نصیر، غوث بخش بزنجو، شیر محمدمری، ڈاکٹر خدادادگل ، گل بنگلزئی ، عبدالواحد کرد، عبدالکریم شورش، فیض محمد یوسفزئی و ایلو ادباء و شعراک دا سرکل آن فیض دوئی کریر۔
ایسر اٹی میر عبداللہ جان جمالدینی و اونا اُرائی نا بخشش کن دعا کننگا و اونا خاہوت میر دوستین جمالدینی ، میر جنید خان جمالدینی و بالاچ خان تون ہڑزخواہی نا درشانی ءِ کرسا دعا کننگا کہ اللہ تعالیٰ اوفتے صبر وجمیل عطاء فرمائفے و میر عبداللہ جان جمالدینی و اونا اُرائی ءِ جنت الفردو س اٹی جاگہ ایتے۔
