ورناک براہوئی زبان و ادب نا شون اٹی تینا کڑد ءِ ادا کننگ ءُ، اگہ داورناتا است بڈی ءِ کننگے تو ہندا ورناک قوم انا معمار جوڑ مریرہ و قوم و ملک انا شون اٹی تیناکڑد ءِ ادا کننگ کیرہ، براہوئی ادبی سوسائٹی نا چیئرمین عبدالقیوم بیدار

ورناک براہوئی زبان و ادب نا شون اٹی تینا کڑد ءِ ادا کننگ ءُ، اگہ داورناتا است بڈی ءِ کننگے تو ہندا ورناک قوم انا معمار جوڑ مریرہ و قوم و ملک انا شون اٹی تیناکڑد ءِ ادا کننگ کیرہ، براہوئی ادبی سوسائٹی نا چیئرمین عبدالقیوم بیدار

کوئٹہ(پاکستان نیوز پوائنٹ 22ستمبر 2016ء) ورناک براہوئی زبان و ادب نا شون اٹی تینا کڑد ءِ ادا کننگ ءُ، اگہ داورناتا است بڈی ءِ کننگے تو ہندا ورناک قوم نا معمار جوڑ مریرہ و قوم و ملک انا شون اٹی تیناکڑد ءِ ادا کننگ کیرہ۔ داہیت ءِ براہوئی ادبی سوسائٹی نا چیئرمین عبدالقیوم بیدار براہوئی ادبی سوسائٹی نا کنڈآن عئید ملن پارٹی و محفل و مشاعرہ نا وخت آ پارے۔

اوپارے کہ براہوئی ادب شون نا کنڈا روان ءِ انتئے کہ ننا بزرگ آک براہوئی زبان و ادب نا بنداو ءِ سوگو تخار ہرا اینو اسہ تنا و درخت اسے نا دروشم اٹ ننا مون آٹی ءِ۔، داوخت آ دود انا صدر و سخاوت ادبی کارروان نا چیئرمین محمد یوسف موج براہوئی ادبی سوسائٹی نا کارکڑد نا ستاءِ کرسا پارے کہ داوڑنا سرسہب پروگرام تا اڈتننگ آن ورناتا است بڈی مریک و اومیت کینہ کہ براہوئی ادبی سوسائٹی تینا دا روایت ءِ برقرار تخک۔

مہمان خاص اقبال ناظر پارے کہ ننا سینئر ادباء و شعراء ورنا تا است بڈی ءِ داوڑ کپسہ ہراوڑ کروئی مرے۔ ای اومیت کیوہ کہ ننا سینئر آک داکنڈاتوجوہ ترسا جونیئر ادباء و شعراورناتا است بڈی ءِ کیرہ تانکہ براہوئی زبان و ادب ءِ زیات فائدہ ملنگ کے۔ دود انا اعزازی مہمان و مستونگ آن بروک آ شاعر حمید عزیز آبادی پارے کہ براہوئی ادبی سوسائٹی نا کارکڑد وخت اتون اوار اوار سائنسی بنداو تیا جاری ءِ۔

غٹ آن مست اسٹیج ڈرامہ غاتا اڈتننگ اوکان گڈ ادبی و تنقیدی نشست آتا اڈتننگ، مشاعرہ ، مذاکرہ و سیمینار آتا اڈتننگ آن براہوئی زبان و ادب ءِ خاطر خواہ فائدہ ملنگ ءِ۔ اوپارے کہ ادبی سوسائٹی نا کنڈآن ورناتا دا مشاعرہ اسہ جوان ءُ پیش رفت اسے ای اومیت تخیوہ کہ براہوئی ادبی سوسائٹی تینا روایت ءِ برقرار تخک۔ میزبانی نا فرض ءِ ادبی سوسائٹی نا جنرل سیکرٹری حنیف مزاج ادا کرے۔

مشاعرہ ٹی ہراشاعرآک تینا کلام ءِ بنفیر اوفتے ٹی وحید زہیر،نورخان نواب م، خداداد گل ، حسین بخش ساجد، عجب خان سائل، انور زیب، مان منصور، رازق ابابکی، کلی ساگر، سلام صائم، حسن ندیم ، ابراہیم ہنین، اسحاق ناز، جمیل فرہاد، نوراحمد نور، ظفر معراج ، اعجاز سنگت، اکبر نعیم ، احسن شاہوانی ، حمید جمال، میر سجاد و عزیز بیدار ئسک اوار ئسر۔ گڈ اٹی شریک مروک آتا اعزاز اٹی عئید ملن پارٹی اس تننگا۔