اسلام آباد(پاکستان نیوزپوائنٹ 23مارچ2018ء) صدر مملکت ممنون حسین پارینے کہ ننا تاریخ اٹی 23مارچ کون ءُ پین ہچ ءُ دے اس اف، انتئے کہ ہندادے ننا بزرگ آک فیصلہ کریسر کہ درملکی حکمران و متعصب گیشتری نا غاصبانہ طرز عمل ءِ شکست ترسا تینا قسمت نا مالک تینٹ مرین۔ داخیال آتا درشانی ءِ صدر مملکت جمعہ نادے داڑے پریڈ گراؤنڈ اٹی یوم پاکستان نا وخت آ اڈ ہلوک آ دود آن تران کرسا کرے۔
داوخت آ صدر سوشلسٹ جمہوریہ سری لنکا میتھری پالاسری سینا، وزیراعظم شاہد خاقان عباسی، چیئرمین جوائنٹ چیفس آف اسٹاف کمیٹی جنرل زبیر محمود حیات، آرمی چیف جنرل قمر جاوید باجوہ ، ایئر چیف مارشل مجاہد انور خان، نیول چیف ظفرمحمود عباسی، وزیر دفاع انجینئر خرم دستگیر خان، چندی ملک آتا سفیر، پارلیمنٹ نا باسک ، بنجائی وزیر آک ، جتا ملک آتا فوجی آفیسر آتون اوار الس نا بھلو کچ اس ساڑی ئسر ۔
صدر مملکت پارے کہ 23مارچ 1940 ء آ ننا بزرگ آک اسہ ہندن ءُ پوسکن ءُ، سوگو و جمہوری ملک اس جوڑ کننگ نا عزم کریسر ہراڑے کس اس کسے آ بیداد کننگ کپ و نئے کس اسے نا استحصال ءِ کننگے، نن دا تغ ءِ راست کننگ نا جہد اٹ قربانی پیش کروک آ تینا سرکڑدہ ، بزرگ ، شہید و غازی تے خراج عقیدت پیش کینہ۔ صدر مملکت پارے کہ دا شاندار پریڈ ننا تغ تا اسہ ہنین ءُ تعبیر اسے۔
اوپارے کہ دا اہم انگا قومی تہوار اٹی ننا گچین انگا سنگت ہم پریڈ تون اوار یوم پاکستان نا ایلو دود آتے ٹی شریک ءِ و دامسخت کن سری لنکا نا صدر میتھری پالاسری سینا ہم خصوصی وڑاٹ پاکستان آ بسنے ہراڑآ مچ آ پاکستانی قوم اودے بخیراٹ پاہک۔ صدر مملکت پارے کہ نن یوم پاکستان نا وخت آ پریڈ اٹی خصوصی شرکت کروک آ ترکی، اردن و متحدہ عرب امارات نا فوجی دستہ غاتے ہم گرم جوشی اٹ بخیر کینہ۔
اوپارے کہ داحقیقت اٹ ہچ ءُ شک اس اف کہ جہانی امن و سلامتی کن ننا سنگتی و کمکاری بروک آدے تیٹی پین شون ہلیک و ہندا ننا خارجہ پالیسی نا بنداو ہم ارے ہنداخاطرآن نن ڈیہہ ٹی امن و شونداری نا مخالف آتے خیر سگالی نا کلہو تننگ ءِ المی سرپند کینہ ولے داڑتون اوار اوار داہم صفا کننگ خوانہ کہ ننا امن سنگتی ءِ نزوری سمجھنگ خطرناک ءُ غلطی اس مریک۔
صدر مملکت پارے کہ قومی و علاقائی جوڑ جاڑ و شونداری کن المی ءِ کہ ہر وڑنا بیدادی ، توسیع پسندی، استحصال عزم و ایلوتا تہہ نا معاملہ غاتے ٹی نیام تمنگپ، پاکستان ہندا اصول آ سلوک ءِ و اومیت کیک کہ جہانی برادری ہم ہندا مسلمہ اصول آتا پاسداری ءِ کیک۔ اوپارے کہ پاکستان نا فوج ہندا جوزہ نا رداٹ اقوام متحدہ نا پلیٹ فارم آن دنیا نا چندی بشخ آتے ٹی امن نا اڈتننگ کن تاریخی خذمت سرانجام تننگ ءِ و داچرجوئی اینو ہم سرسہبی اٹ برجاءِ۔
صدر مملکت پارے کہ اوغانستان اٹی بدامنی نا چٹفنگ و اوغان حکومت نا عمل داری ءِ المی جوڑ کننگ کن پاکستان تاریخ ساز کڑد ادا کرینے و نن دامسخت کن تینا سنگت و غٹ شریدار آتون اواری اٹ تینا مثبت کڑد ءِ آخبت اٹ ہم ادا کرسا کینہ۔ صدر مملکت مستی پارے کہ ڈیہہ نا داحالیت اسہ جتا ءُ جہانی نظام اسے نا ردٹ رونما مروک آ واقعہ غاتا نتیجہ ءِ ولے داسہ جہانی سیاسی نظام اسہ بنجاء سے نا تابع متنے ہنداخاطرآن دامننگ کیک کہ اقوام عالم آ تینا مرضی ءِ مسلط کرسا تینا پسند نا دنیااس جوڑ کننگ مرے۔
اوپارے کہ داعہد پرامن بقائے تین پہ تینی نا اصول آتا رداٹ اسہ ایلو نا روا فائدہ غاتے مون آ تخسا مون آ ہِننگ نا تقاضہ ءِ کیک۔ صدر مملکت پارے کہ دے ٹک اٹی ننا ہمسایہ تینا فوجی واک اٹ پدریسہ ودکی کننگ ءِ ، لین آف کنٹرول و ورکنگ باؤنڈری آ بیدادی نا کمک اٹ بے گناہ شاری تا جان و مال نا نسخان ءِ کننگ انگ ءِ و ننا ہمسایہ ملک تینا دا غیر زموارانہ طرز عمل اٹ ڈیہہ نا امن ءِ داؤ آ خلکونے۔
صدر مملکت بھارت ءِ خبردار کرسا پارے کہ مقبوضہ کشمیر اٹی جاری خالصتاََ ہندی تحریک آجوئی آ بیدای ءِ بند کے انتئے کہ آجوئی نا تحریک آتے واک انا زور اٹ توننگ مفک۔ اوپارے کہ کشمیر نا ویل انا اسٹ انگا ایسری اقوام متحدہ نا قرارداد آتا رداٹ استصواب رائے نا کمک اٹ حق خودارادیت نا بحالی ءِ و پاکستان دامسخت نا دوئی کن تینا کڑد ءِ ادا کرسا کیک ۔
صدر مملکت پارے کہ گدرینگوک آ مسہ دہائی ٹی ڈیہہ ٹی رونما مروک آ بدلی و جنگ و جدل علاقہ نا امن و سوگوی ءِ بھس کرینے ہراڑآن پاکستان ہم زہمی مسنے۔ اوپارے کہ پاکستانی قوم و پاکستان نا فوج آپریشن ضرب عضب و ردالفساد کون آ کارروائی تا کمک اٹ دا چیلنج نا مقابلہ ءِ پورو عزم و ہمت اٹ کرینو و قوم دا جہد ءِ قدر انا نظر اٹ ہرک۔ صدر مملکت داوخت آ دہشت گردی و انتہاء پسندی نا چٹفنگ کن تروک آ دا قربانی تا اعتراف اٹی سلہہ بند فوج و کانود نافذ کروک آ ادارہ غاتے کن اسہ پوسکن ءُ میڈل ”تمغہ عزم“ نا پڑو ءِ ہم کرے انتئے کہ قوم انا دا قربانی تے ٹی ملک اٹی امن وایمنی بحال مسنے و معیشت اٹ ہم گچینی بسنے۔
اوپارے کہ سرسہبی نا دا چرجوئی ءِ برقرار تخنگ المی ءِ تانکہ آخبت اٹ دا عفریت دُوارہ ودی مف، و دارداٹ داحقیقت ءِ مون آ تخنگ ہم المی ءِ کہ گڑاس وخت زند انا ایلو بشخ آتے ٹی ودی مروک آبے است جمی راج انا سکون ءِ شیف و بڑز کیک۔ صدر مملکت مستی پارے کہ غیر جانبداری ، بے پرخ انصاف و نیک نیتی دُن انگا ویل آتا گچین ءُ درمان اسے و داہیت است جمی اسے کہ ننا جمہوری ادارہ غاک فعال ءُ و آئینی دنگ انا تہٹی سلسا تینا کڑد ءِ ادا کننگ ءُ۔
اوپارے کہ اِرا گچین مروک آ جمہوری حکومت آک ہم تینا مد ءِ پورو کننگ اٹ سرسہب مسنو، دامعاملہ غاتے ٹی گڑاس تپہ غاتا اگہ گڑاس گڑتیک اریر تو المی ءِ کہ اوفتیا دمدستی چکار کننگے تانکہ انتہاپسندی تون اوار قومی زند انا چندی پڑ تیٹی دوئی کروک آ سرسہبی تا تسلسل ءِ برقرار تخنگ مرے۔ صدر مملکت یوم پاکستان نا وخت آ پروقار پریڈ انا شاندار اڈتننگ آ پریڈ کمانڈر ، ساڑی مروک آک، ہندی انتظامیہ و ضلعی حکومت ءِ شاباشی تس و پارے کہ ننے تینا آفیسر و ورناتا مستعدی و کسبی آب آ فخر ءِ ۔
او تینا بہادر آفیسر و ورناتے پنت و شون کرسا پارے کہ او ملک و ملت نا رکھ و سلامتی کن بہادری ، نیک نیتی و ایمانداری اتون تینا آئینی زمواری تے ادا کرسا کیر و دا مقدس فرض انا ادائیگی ٹی او ہر ہم وطن ءِ تینا شانہ بشانہ خنرہ۔
