اسلام آباد(پاکستان نیوزپوائنٹ 22مارچ2018ء) پاکستان اٹی چین نا ڈپٹی چیف آف مشن چاؤلی جیان پارینے کہ چین پاکستان اقتصادی راہداری ڈٹ آ مچ آ ملک اٹی کاریم ترندی اٹ برجاءِ، پاکستان و چین ہڑتوم آک پاک چین اقتصادی راہداری ڈٹ ءِ پورو کننگ کن پرعزم ءُ۔ پاکستان ءِ تینا سچا سنگت سرپند کیک، سی پیک آن مچ آ ڈیہہ ٹی شونہالی بریک، سی پیک نا سرسہبی ٹی میڈیا و دودوربیدگی بشخ آتے ٹی رابطہ و کمکاری نا اہم ءُ کڑد اس مریک۔
داخیال آتا درشانی ءِ او ”اے پی پی“ تون ہیت وگپ کرسا کرے۔ چاؤلی جیان پارے کہ سی پیک پاک چین سنگتی نا اسہ اہم ءُ عنصر اسے۔ اوپارے کہ ڈیہہ نا شونداری چین نا متکن ءُ تغ اسے۔ چین پاکستان ءِ تینا گچین سنگت سرپند کیک، چین پاکستان اقتصادی راہداری بیرہ چین و پاکستان نا نیام اٹ کمکاری ءِ ودفنگ کن حکمت عملی نا پن آخا بلکن دا دا مچ آ ڈیہہ نا شونداری و شونہالی کن اہم ءُ کڑد اس ادا کیک۔
اوپارے کہ اقتصادی راہداری آن نئے بیرہ ہڑتوم آ ملک آک بلکن ڈیہہ نا ایلو ملک آتے ہم فائدہ رسینگک۔ اوپارے کہ بیلٹ اینڈ روڈ ڈٹ 21 می صدی نا اہم ءُ ڈٹ اسے، داڑآن افریقہ، ایشیا، دے ٹک نیامی و یورپ نا 65 ملک آک گنڈنگرہ۔ سی پیک بیلٹ اینڈ روڈ ڈٹ انا فلیگ شپ ڈٹ ءِ۔ سی پیک آن ہر چار آ صوبہ، گلگت بلتستان آزاد جموں و کشمیر و فاٹا اسہ وڑ فائدہ ہرفرہ۔
