وزیراعظم شاہد خاقان عباسی نا مصر انا مفتی اعظم ڈاکٹر شوکی ابراہیم عبدالکریم تون ہیت وگپ

وزیراعظم شاہد خاقان عباسی نا مصر انا مفتی اعظم ڈاکٹر شوکی ابراہیم عبدالکریم تون ہیت وگپ

اسلام آباد(پاکستان نیوزپوائنٹ 22مارچ2018ء) وزیراعظم شاہد خاقان عباسی پارینے کہ پاکستان و مصر ءِ دہشت گردی نا ویل اتون اوار اسہ وڑنا چیلنج آتا مون تروکی مس، مفتی اعظم مصر انا دورہ پاکستان و اونا کنڈآن پاکستان نا غٹ مکاتب فکر انا 1800 آن زیات عالم دین نا دہشت گردی نا برخلاف فتوہ نا توثیق آن انتہاء پسند ذہنیت تون مون تننگ نا کوشست آتے پین سوگوی ملک۔

اوداہیت ءِ مصر انا مفتی اعظم ڈاکٹر شوکی ابراہیم عبدالکریم تون پنچ شنبے نادے آ وزیراعظم آفس اٹی ہیت وگپ کرساپارے۔ وزیر مذہبی امور سردار محمد یوسف ، وزیر مملکت پیر امین الحسنات شاہ و مصر انا سفیر احمد محمد فضل یعقوب ہم داوخت آ ساڑی ئسر۔ وزیراعظم پارے کہ اسلامی کاز اکن شاندار خذمت آتا اعتراف اٹی پاکستان نا حکومت مفتی اعظم ڈاکٹر شوکی ابراہیم عبدالکریم ءِ ”ہلال قائداعظم “ نا اعزاز تننگ نا فیصلہ کرینے۔

وزیراعظم مصر انا مفتی اعظم نا ستاءِ کرسا پارے کہ اونا دورہ غان پاک۔ مصر ہڑتوم آ کنڈآتا تعلقداری تے پین سوگوی ملک و تین پہ تینی است خواہی نا غٹ بشخ آتے ٹی کمکاری ودک۔ اوجامعہ الازہر نا فکری و تعلیمی خذمت آتا ستاءِ کرسا پارے کہ دا اسلامی دنیاٹی اعتدال نا توار مسنے۔ وزیراعظم تین پہ تینی کمکاری ءِ سوگوی تننگ و علم و مہارت نا تبادلہ کن ہڑتوم آ ملک آتا نیام اٹ طالب علم و مذہبی راہشون تا دورہ غاتا ہن و بر تون اوار غٹ کہول آ تیا گیشتر رابطہ غاتا گرج آ زور شاغا۔

مفتی اعظم ڈاکٹر شوکی ابراہیم عبدالکریم دورہ ٹی حکومت پاکستان نا کنڈآن پرجوش خیرمقدم و مہمان نوازی آ وزیراعظم نا منت واری ءِ ہرفے۔ او ”کلہو پاکستان“ نا اقدام و مذہبی رواداری نا مون آ دننگ نا بارواٹ جہانی کانفرنس نا اڈتننگ نا ستاءِ کرسا پارے کہ داڑآن دہشت گردی نا لعنت تون مون تننگ کن پاکستان نا مخلصانہ کوشست آتا بابت اسہ پبی ءُ کلہو اس رسینگک۔ اومصر انا حکومت و الس نا کنڈآن پاکستان نا حکومت و الس کن نیک است خواہی تے ہم سرکرے۔