کراچی، چین پاکستان اقتصادی راہداری ڈٹ نئے بیرہ پاکستان بلکن مچ آ ڈیہہ کن گیم چینجر اس جوڑ مریک، اسپیکر بلوچستان اسمبلی گودی راحیلہ حمید خان درانی

کراچی(پاکستان نیوزپوائنٹ 22مارچ2018ء) اسپیکر بلوچستان اسمبلی گودی راحیلہ حمید خان درانی پارینے کہ چین پاکستان اقتصادی راہداری ڈٹ نئے بیرہ پاکستان بلکن مچ آ ڈیہہ کن گیم چینجر اس جوڑ مریک۔ سی پیک آن مروک آ براہ راست درملکی زرکاری آن مچ آ ڈیہہ نا قسمت بدلینگک۔ سی پیک ڈٹ انا رداٹ بنداوی ڈھانچہ نا گچینی و انرجی سپلائی آن شونداری و شونہالی تون اوار اوار معیشت ہم سوگو مریک۔

داخیال آتا درشانی ءِ اوتدوک آ دے کراچی ٹی حکومت بلوچستان، پاکستان انسٹی ٹیوٹ آف مینجمنٹ و بلوچستان اکنامک فورم اواری اٹ CPEC HIDDEN DIMENSIONS نا سرحال آن اڈ ہلوک آ اسہ دے ئی کانفرنس نا ساڑی مروک آتیان تران کرسا کرے۔ اسپیکر پارے کہ چین پاکستان اقتصادی راہداری ڈٹ ننا ڈیہہ کن دا صدی نا گیم چینجر ءُ ڈٹ اسے ہراڑآن اقتصادی شونداری و روزگاری نا پوسکن ءُ کسر ملنگک۔ داڑآن زیات دا ڈٹ انا پوروی آن ڈیہہ ٹی امن و معیشت شون ہلیک۔ اسپیکر پارے کہ ہراتم نن سی پیک نا ہیت ءِ کینہ تو بلوچستان نا ذکر کننگ المی مریک انتئے کہ دا پوسکن آ ڈٹ بلوچستان ءِ پاکستان نا پوسکن آ معاشی فرنٹیئر نا وڑاٹ شون ہلنگ نا گمان اٹی ودکی کرینے۔