اسلام آباد(پاکستان نیوزپوائنٹ 22مارچ2018ء) وزیر دفاع انجینئر خرم دستگیر خان پارینے کہ پاکستان ملک انا غٹ بشخ آتیان دہشت گردی نا ماس آن چٹفنگ نا بابت اہم کڑد ادا کرینے۔ آپریشن ضرب عضب نا کمک اٹ دہشت گرد آتا غٹ اودیم جاگہ غاتے چٹفنگانے۔ داخیال آتا درشانی ءِ او اسہ نجی ٹی وی چینل اسے تون ہیت وگپ کرسا کرے۔ اوپارے کہ دہشت گرد آتا سلوک آتے ماس آن چٹفنگ کن آپریشن ردالفساد سرسہبی اٹ برجاءِ۔
اومستی پارے کہ پاکستان اسہ ہم ملک اسے نا برخلاف تینا گل زمین ءِ کاریم اٹ اتنگ نا موکل تفک۔ بنجائی وزیر نا پاننگ ئس کہ ننا سلہہ بند فوج انا داغٹ آن اہم انگا زمواری ءِ کہ او تینا لمہ وطن نا سیم تا رکھ ءِ کے۔ اسہ سوج اسے نا ورندی ٹی اوپارے کہ حکومت اوغانستان اٹی امن نا اڈتننگ کن کمک فراوان کننگ کیک۔ خرم دستگیر خان نا پاننگ ئس کہ محمد نواز شریف مدام عدالت آتا شرف ءِ کرینے و کانود نا بالادستی کن تینے عدالت آتا مون آ پیش ہم کرینے۔ اومستی پارے کہ ننا جماعت نا سیاسی فیصلہ غاتے ٹی محمد شہباز شریف اہم کڑد ادا کننگ ءِ۔
