اسلام آباد(پاکستان نیوز پوائنٹ 08ستمبر 2016ء) پاکستان مسلم لیگ (ن) نا کسرشون طاہرہ اورنگزیب پارینے کہ وزیراعظم محمد نواز شریف نا کنڈآن غٹ صوبہ غاتیٹی بے پرخ شونداری کاریم تا مقصد گچین بنجانا اڈتننگ ءِ۔ ریڈیو پاکستان تون ہیت وگپ کرسا اوپارے کہ پاکستان مسلم لیگ (ن) نا حکومت نا برسراقتدار بننگ تون ہی وزیراعظم محمد نواز شریف ہر مسہ توانا وخت آ بے پرخ ہرصوبہ غاتا دورہ ءِ کرے و ہموڑے کیہی شونداری ڈٹ آتا بناءِ کرے ہرانا مقصد غٹ صوبہ غاتے اواری اٹ دننگ و گچین بنجاء اس جوڑ کروئی ءِ۔
اوپارے کہ گوادر پورٹ، ونڈ پاور و کول پروجیکٹ، پاک چین اقتصادی راہداری ، لواری ٹنل ، موٹرویز و انفراسٹرکچر ءِ گچین جوڑ کننگ تون اوار ایلو غٹ ڈٹ آک ملکی شون نا سوب جوڑ مننگ ءُ و پیشن نا زرکاری ملک اٹی بننگ ءِ۔ اوپارے کہ اپوزیشن ءِ مرے کہ او منفی سیاست نا بائیکاٹ ءِ کے و وزیراعظم تون تفے تانکہ ملکی معیشت اٹی پین گچینی برے بے روزگاری نا خاتمہ مرے تعلیم ءِ مون آ دننگے و لس بندغ شونہال زند ءِ گدریفے۔
اوپارے کہ بلدیاتی گچین کاری تیٹی الس منفی سیاست کروک آتے مسترد کرینے و داسا اوفتے داڑآن سبخ اس ہیل کروئی مرے ۔ پروگرام اٹی ہیت وگپ کرسا پاکستان مسلم لیگ (ن) نا کسرشون و پارلیمانی سیکرٹری محمد نذیر جان پارے کہ ملک اٹی تعلیم، جان جوڑی ، صاف و توانائی تنکی نا مون ءِ توننگ ننا اولین اولیت ءِ۔
