ننا بننگ آن اسٹاک ایکسچینج اتون اوار ہر بشخ شون ہلک۔

وزیراعظم محمد نواز شریف کراچی آن پشاور اسکان موٹروے جوڑ کننگک، بلوچستان نا کونہ کونہ ٹی روڈ جوڑ مننگ ءِ ، بجلی و گیس انا کاختی ءِ چٹفنگک اسٹاک ایکسچینج نا گچین کمپنی تے ایوارڈ تننگ نا دود آن تران

ننا بننگ آن اسٹاک ایکسچینج اتون اوار ہر بشخ شون ہلک۔
وزیراعظم محمد نواز شریف کراچی آن پشاور اسکان موٹروے جوڑ کننگک، بلوچستان نا کونہ کونہ ٹی روڈ جوڑ مننگ ءِ ، بجلی و گیس انا کاختی ءِ چٹفنگک اسٹاک ایکسچینج نا گچین کمپنی تے ایوارڈ تننگ نا دود آن تران

کراچی(پاکستان نیوز پوائنٹ 08ستمبر 2016ء) وزیراعظم محمد نواز شریف پارینے کہ پورو کوشست کننگ اُن کہ پاکستان شون نا مزل ءِ دوئی کرسا کے، کراچی آن پشاور اسکان موٹروے جوڑ کننگک، بلوچستان نا کونہ کونہ ٹی روڈ جوڑ مننگ ءِ، بجلی و گیس انا کاختی ءِ چٹفنگک، حکومتی گام گیج آتا سوب کاروباری سرجزآتیٹی ودکی مسنے، برآمدات آتیٹی ودکی کن جتا سلاہ تا جاچ ءِ ہلنگ اُن، کراچی اسٹاک ایکسچینج نا 100 انڈیکس 40 ہزار نا بڑزانگا کہول آٹی ءِ۔

پنچ شنبے آ داڑے اسٹاک ایکسچینج نا گچین کارکڑد نا حامل کمپنی تے ایوارڈ تننگ نا دود آن تران کرسا اوپارے کہ شون نا پوسکنا باب ملنگ انگ ءِ ، 2018 ء اسکان بجلی نا لوڈشیڈنگ چٹک۔ بجلی ودی کننگ کن نہ صرف مچ آ ملک اٹی کارخانہ خلنگ انگ ءِ بلکن بجلی ءِ ہڑزان ہم کننگ اُن۔ پی آئی اے ، ریلوے تون اوار ایلو ادارہ غاتے گچین جوڑ کننگ اُن ۔ اوپارے کہ ننا کوشست ءِ کہ ہر پٹ اٹی پاکستان شون ہلے، ادارہ غاتا نجکاری آن فائدہ دوئی مس۔

اوپارے کہ ننا بننگ آن اسٹاک ایکسچینج تون اوار ہر بشخ شون ہلک، اللہ کے نن برسا کین و اسٹاک ایکسچینج ودسا کے۔ ملک شون ہلسا کے۔ اوپارے کہ دنیا پاننگ ءِ کہ پاکستان نا اسٹاک ایکسچینج دنیا نا گچین اسٹاک ایکسچینج آتیٹی اوارے۔ پاکستان نا میکرواکنامک ٹک آک گچین ءُ۔ پورٹ قاسم تھر تون اوار مچ آ ملک اٹی بجلی نا کارخانہ لگنگ ءُ۔ اوپارے کہ بینک آتا نجکاری آن بینک آک کٹیا تننگ نا بناءِ کرینو۔

اوپارے کہ نجکاری آن ہچ ءُ بے روزگاری اس متنے بلکن ملک اٹی روزگار اٹی ودکی مننگ ءِ۔ وزیراعظم پارے کہ ٹیکس آتا وصولی ٹی 60 دروسد ودکی مسنے۔ اوپارے کہ 1972ء آن گڈ ادارہ غاتا نیشنلائز یشن آن ملک ءِ معاشی نسخان مس، سفارش آتیا بے شمار بھرتی کننگا ، معیشت ڈبنگا، نن حالیت آتے گچین جوڑ کرین و تینا ہر مسٹ آ دور آتیٹی شون نا سفر ءِ برجاتخان۔ 1991ء ٹی نجکاری نا بناءِ کرین ، موٹروے تون اوار شون و شونہالی نا ڈٹ تسن، داوخت آ کراچی آن لاہور موٹروے آ کاریم جاری ءِ۔

مچ آ ملک انا صنعت آتے 100 درسد بجلی تننگ انگ ءِ، نن غٹ معاملہ غاتے ٹھیک کرینن۔ 1993ء ٹی ملک ٹیک آف کریکہ، پیسہ پیشن ہنتو بلکن پیسہ ملک اٹی بس۔ اوپارے کہ مسہ سال مست ہراتم نن حکومت ءِ سنبھالان تو اسٹاک ایکسچینج 100 انڈیکس 19 ہزار ئس ہرا 40 ہزار اسکان سرمسنے۔ اوپارے کہ کراچی آن حیدرآباد ، حیدرآباد آن سکھر آن ملتان موٹروے پروجیکٹ زوت پورو مریک و ہنداوڑ مچ آ ملک انا موٹروے تون رابطہ مریک۔

او پارے کہ اینو پی آئی اے نا جہازآک مسافر آن پُر ہِننگ ءُ دا نا مطلب ءِ کہ پاکستان شون ہلنگ ءِ۔ وزیراعظم پارے کہ حکومت جاچ ہلنگ ءِ کہ نن ہراوڑ پین آسراتی ایتن تانکہ برآمدات آتیٹی ودکی مرے۔ اوپارے کہ ریلوے نا بنداوی ڈھانچہ ءِ شون تننگ اُن و اودے اپ گریڈیشن کننگک۔ اوپارے کہ برآمد کنندگان آتا کسر اٹی بروک آ اڑاند آتے مر کننگک۔ وزیراعظم پارے کہ گیس انا کاختی مچ آ ملک آن زوت چٹک۔

اوپارے کہ مسکوہی حکمران آتیان ہرفنگے کہ ملک ءِ تہاری تیٹی انتئے بٹنگا۔ اوپارے اینو پاکستان ہر بشخ اٹی شون ہلنگ ءِ ۔ زرمبادلہ نا کوڑی بڑزنگا کہول آٹی ءِ۔ نن معاشی حالیت آتے گچین جوڑ کرینن۔ پاکستان نا شون نا سفر ءِ برجاتخنہ۔ وزیراعظم خاص کر کراچی اسٹاک ایکسچینج نا صدر منیر کمال ءِ خراج تحسین پیش کرے ہرانا کوشست آتا بدولت اسٹاک ایکسچینج زبردست شون ہلکونے۔

دود آن وزیر خزانہ سینیٹر اسحاق ڈار ہم تران کرے و پاکستان نا معاشی حالیت آتا گچینی ءِ تالان کرے۔ اوپارے کہ اسہ سال اٹی کارپوریٹ سیکٹر اٹی اصلاحات اتنگانے۔ کراچی اسٹاک ایکسچینج ءِ پاکستان اسٹاک ایکسچینج اٹی ضم کننگانے۔ کاروباری سرجزآتیٹی ودکی کن پوسکنا کانود واضح کننگانے۔ جہانی مالیاتی ادارہ پاکستان نامعاشی شون نا اعتراف ءِ کننگ ءُ۔