اسلام آباد(پاکستان نیوز پوائنٹ 06ستمبر 2016ء) وزیر مملکت دیر و بجلی چوہدری عابد شیرعلی پارینے کہ 2018 ء ٹی ملک آن تہاری تے ہمیشہ ہمیشہ کن چٹفنہ، 6 ستمبر شہید، غازی و پاکستان نا بقانا دے ءِ، عمران خان نواز شریف فوبیا ٹی دماغی توازن تے کاریم ءِ ہلانے۔ سے شنبے آ پارلیمنٹ ہاؤس نا پیشن میڈیا تون ہیت وگپ کرسا اوپارے کہ وزیراعظم نا سروکی ٹی ملکی شون و شونہالی نا ایجنڈہ جوانی اٹ مون آ ہِننگ ءِ، وزیراعظم نا خصوصی توجوہ آن ملک آن بجلی نا لوڈشیڈنگ نا چٹفنگ کن بھلا بھلا ڈٹ آتیا کاریم برجاءِ۔
2018 ء ٹی نیشنل گریڈ اٹی وافر کچ اٹی بجلی اوار مریک ہراڑآن ملک آن ہمیشہ ہمیشہ کن تہاری تے چٹفنگک۔ اسہ سوج اسے نا ورندی ٹی اوپارے کہ نواز شریف ءِ سیاست آن آؤٹ کننگ نا تغ ءِ خنوک آک دُن مف کہ تینٹ سیاست نا اہلیت آن دوتے سلور۔ اوپارے کہ نواز شریف نا مخالفت اٹی عمران خان ہردے خلوک ءُ تغ خنسا خنسا اونا ذہنی توازن داسا کاریم ءِ ہلانے۔ دھرنہ و برانز نا سیاست آن الس نا شون و شونہالی نا عمل معطل مریک۔
عمران خان ءِ الس نا شون تون ہچ ءُ غرض اس اف۔ او صرف تینے وزیراعظم جوڑ کننگ خواہک خواہ اوڑکن انت کہ قیمت اس اودے تروئی تمے۔ 6 ستمبر نا بابت اسہ سوج اسے نا ورندی ٹی اوپارے کہ دا شہید، غازی تا دے ءِ دا دے پاکستان نا بقاء نا یات ءِ ترفک ۔ ہنداخاطران دادے یوم دفاع پاکستان نا پن تننگانے۔ قوم تینا ہیروز آتا قربانی تے ہمیش یات تخک۔
