اسلام آباد(پاکستان نیوز پوائنٹ 02 ستمبر 2016ء) صدر مملکت ممنون حسین پارینے کہ پاکستان و ترکی معیشت وواپار تون اوار زند انا غٹ بشخ آتیٹی خڑکی کمکاری ءِ برجاء تخرہ، ترک ادارہ غاتا کنڈآن پاکستان اٹی ساڑی ہی ٹی کیہی بشخ آتیٹی کروک آ زرکاری است بڈءِ۔ اومیت ءِ کہ ترک حکومت پاکستان اٹی انفراسٹرکچر ، سالڈویسٹ مینجمنٹ و فوڈ پروسیسنگ تون اوار کیہی بشخ آتیٹی زرکاری کن ترک کمپنی تا است بڈی برجاتخک۔
اوداہیت ءِ ترکی نا فارن انوسٹمنٹ اکنامک ریلیشنز بورڈ انا صدر مر جادوردان تون ہیت وگپ کرسا پارے ہراجمعہ آ تینا ڈل اتون اوار ایوان صدرا ٹی اوڑتون اوڑدہی کریر۔ داوخت آ ترک سفیر صادق بایر گرکن پاک ترک بزنس کونسل نا شریک چیئرمین، اٹیلا دیمریاریکایا و ایلوکمامدارآک ہم ساڑی ئسر۔ صدر مملکت پارے کہ پاکستان و ترکی نا نیام اٹ دا سال فری ٹریڈ ایگریمنٹ نا معاہدہ ہڑتوم آ ملک آتا نیام اٹ واپار نا مون آ دننگ نا ذریعہ جوڑ مریک و تین پہ تینی واپار ہڑتوم آ برادر ملک آتا پبی لائخی تا رداٹ مننگ کیک۔
صدر مملکت پارے کہ ہڑتوم آملک آتا نیام اٹ ساڑی آ واپاری کچ لائخی آن کم ءِ۔ دااومیت کننگ مریک کہ فری ٹریڈ ایگریمنٹ واپار نا کچ ءِ ودفنگ اٹی کمکار ثابت مریک۔ اوپارے کہ دا ہیت خوش آئند ءِ کہ ہڑتوم آ ملک آتا نیام اٹ واپار ءِ ودفنگ نا بابت آن مذاکرات سہی سمت آ روان ءِ۔ صدر ممنون حسین پارے کہ میٹرو بس ڈٹ، سالڈ ویسٹ مینجمنٹ و ونڈ مل کون آ ڈٹ آک ہڑتوم آ ملک آتا نیام اٹ خڑکی کمکاری نا مثال ءِ۔
اوپارے کہ ترکی نا زرکارآتے پاکستان اٹی توانائی و انفراسٹرکچر نا بشخ آتیٹی ہم زرکاری کروئی مرے۔ داکان بیدس ہڑتوم آ ملک آتے کیہی بشخ آتیٹی اسہ ایلو نا آزموندہ غاتیان فائدہ ہرفوئی مرے۔ صدر مملکت پارے کہ پاک چین اقتصادی راہداری آن پوسکنا گمان آک ودی مریرہ ہراڑآن ترکی ءِ ہم فائدہ ہرفوئی مرے۔ صدر مملکت پارے کہ پاکستان دہشت گردی نا برخلاف جنگ اٹی ترکی تون سلوک ءِ، ساڑی آ دہشت گردی ناواقعہ غاتیٹی قیمتی جان تا زیان آ نن ترکی نا ڈکھ اٹی بریبر نا شریک اُن۔
