کوئٹہ(پاکستان نیوزپوائنٹ14نومبر2017ء) وزیراعظم شاہد خاقان عباسی بلوچستان نا غٹ علاقہ غاتے شونداری لحاظ اٹ ملک انا ایلو علاقہ غاتا بریبر اتنگ کن 10سالہ ”ایکولائزیشن پیکج “ نا پڑو ءِ کرسا پارینے کہ صوبہ ٹی یونین کونسل نا کہول آ تعلیم، جان جوڑی، گیس، کنوئی ءُ صاف دیر اتون اوار اوار چندی بشخ آتیا تالان شونداری پیکج اس تیار کننگ انگ ءِ ہراڑآ ہندا سال عملدرآمد بناء کیک، گچین مروک آ جمہوری حکومت نا 5سالہ مد جون اٹی پورو مریک اوکان پد تخوک آ وخت آ لس گچین کاری مریرہ۔
او سے شنبے نادے گورنر ہاؤس اٹی بلوچستان اٹی شونداری ڈٹ و امن و ایمنی نا حالیت آتا بابت بڑزکو کہول انا دیوان تا کماشی آن پد میڈیا تون ہیت وگپ کریکہ۔ گورنر بلوچستان محمد خان اچکزئی ، وزیراعلیٰ بلوچستان نواب ثناء اللہ زہری ئسک ہم داوخت آ ساڑی ئسر۔ وزیراعظم شاہد خاقان عباسی کوئٹہ ٹی تینا اختہ مننگ نا ذکر ءِ کرسا پارے کہ داڑے مروک آ دیوان اٹی پاک۔
چین اقتصادی راہداری (سی پیک) و بلوچستان اٹی جاری ایلو شونداری ڈٹ آتا جاچ ءِ ہلنگانے۔ اوپارے کہ بلوچستان ءِ ایلو صوبہ غاتا بریبر اتنگ کن 10 سالہ ایکو لائزیشن پیکج نا بابت وزیراعلیٰ بلوچستان نا کنڈآن سلاہ پیش کننگا ہراڑآن بنجائی حکومت امنا کرینے، داپیکج کن نیمہ فنڈ بنجا ونیمہ فنڈ صوبہ ایتک و ہندا سال ڈٹ آ عملدرآمد بناء کیک ، پیکج اٹی بلوچستان اٹی یونین کونسل نا کہول آ جوڑ جاڑ و شونداری ، تعلیم و جان جوڑی نا بشخ اٹی آسراتی، گیس انا ڈٹ و کنوئی ءُ صاف دیر انا ڈٹ آک اوار ءُ تانکہ صوبہ ٹی خننگوک آ کمتی ءِ پورو کرسا بلوچستان ءِ ایلو صوبہ غاتا بریبر اتنگ مرے۔
اوپارے کہ دیوان اٹی سی پیک ڈٹ و ایلو شونداری ڈٹ آتا سرجم جاچ ءِ ہلنگانے، سوئی سدرن گیس کمپنی نا کنڈآن گیس سپلائی سسٹم اٹی ایل پی جی ءِ مکس کننگ نا بابت 20 ارب روپئی خڑچ انا ڈٹ انا جاچ ءِ ہلنگا وخت اس کہ سی پیک نارداٹ 80 ارب نا ڈٹ آتا ہم جاچ ءِ ہلنگا۔ اوپارے کہ ننا کوشست مریک اسہ یا اِرا 2تُو اٹی کوئٹہ نا دورہ ءِ کرسا داڈٹ آتا جاچ ءِ ہلنگے تانکہ داڈٹ آتا کارکڑد پین است جم مرے۔ اسہ سوج اسے نا ورندی ٹی اوپارے کہ حکومت و جمہوریت چلینگ انگ ءُ، جون اٹی ساڑی آحکومت تینا مد ءِ پورو کننگ ءِ اوکان پد 2تُو اٹی لس گچین کاریک مریرہ وجمہوریت چلینگسا کیک۔ اسہ پین سوج اسے نا ورندی ٹی اوپارے کہ آئین نا رداٹ حکمرانی مریک ، آئین و کانود نا بایدے بالادستی مرے۔
