اسلام آباد (پاکستان نیوز پوائنٹ 29اگست 2016ء) بنجائی وزیر ڈٹ بندی و شون و اصلاحات پروفیسر احسن اقبال پارینے کہ 46 ارب ڈالر آن 18 ارب ڈالر نا ڈٹ آتیا کاریم جاری وخت اس کہ 17 ارب ڈالر پیپ لین اٹی ءُ ، پاکستان و چین 2018 ء ٹی اسیجائی سٹیلائٹ لانچ کیرہ، سی پیک ڈٹ صرف روڈ نیٹ ورک اس اف بلکن پورو فریم ورک اسے، ڈٹ ہڑتوم آ ملک آتا وژن نا ملفنگ ءِ ، اقتصادی راہداری ڈٹ انا رداٹ اولیکو مرحلہ نا ڈٹ 2017-18 ء ٹی پورو مریک۔
داخیال آتا درشانی ءِ او دوشنبے آ داڑے چین پاکستان اقتصادی راہداری سمٹ اینڈ ایکسپو آن تران کرسا کرے۔ بنجائی وزیر پارے کہ چین پاکستان اقتصادی راہداری معاشی کمک و کاروباری رابطہ غاتے قائم کننگ نا ڈٹ ءِ، ڈٹ انا رداٹ بھلو کچ اسے آ چینی زرکاری بریک و صنعتی زونز آک اڈ ہلیرہ۔ اوپارے کہ نیامی ایشیا و پاکستانی واپاری ادارہ غاتا نیام اٹ رابطہ غاتے گچین جوڑ کننگ نا گرج ءِ ، 2018 ء اسکان ملک اٹی 10 ہزار 4 سد میگاواٹ بجلی نا پیداوار نا ڈٹ پورو کننگرہ ہرانا پوروی آن ملک اٹی توانائی نا تنکی نا مونءِ توننگک۔
اوپارے کہ داڈٹ سی پیک نا رداٹ پورو مننگ آن پد ملک انا معاشی و راجی حالیت آتیٹی ترندی اٹ گچینی بریک، چین انا کمپنی 10 ہزار میگاواٹ بجلی نا ڈٹ آتا بروخت پوروی کن دے و نن خواری کننگ ءُ، چین انا کمپنیک ٹرانسمیشن و ڈسٹری بیوشن لائنز آتا گچینی کن ہم کاریم کننگ ءُ ہرا فی الحال زیات بھاریم برداشت کننگ کن قابل اف۔ اوپارے کہ سی پیک ڈٹ اسہ سال انا تہہ ٹی اسہ کاغد اسے نا ٹکر آن 46بلین ڈالر نا رکاری ٹی بدل مس۔
دیکی روٹ آ کاریم جاری ءِ، بین الاقوامی گوادر ایئر پورٹ و ایکسپریس وے آ چین نا کنڈآن کاریم آخریکو مرحلہ غاتیٹی ءِ، راہداری ڈٹ مسہ ارب خلقت آتا قسمت ءِ بدلیفنگ نا ڈٹ ءِ، داڈٹ آن پاکستان نا پسماندہ علاقہ غاتیٹی رہینگوک آتے فائدہ مریک۔ اوپارے کہ سی پیک سمٹ و ایکسپو آن خلقت آتیٹی اقتصادی راہداری ڈٹ انا بارواٹی شعور تالان کننگ اٹی کمک رسینگک، چین پاکستان اقتصادی راہداری سمٹ نا ہدف کاروباری شخصیت و نجی بشخ ءِ دا ڈٹ انا بروک آ مرحلہ کن تیار کروئی ءِ۔
سمٹ اٹی پاکستان و چین نا زرکارو چاہندارآک ڈٹ انا کیہی پلو آتا بارواٹی زیات آن زیات معلومداری دوئی کننگ کیرہ وخت اس کہ پاکستان نا کاروباری شخصیت آتے ہم تینا چینی ہم منصب آتون مشترکہ زرکاری کن وارخواہی پٹنگ اٹی کمک رسینگک۔ اوپارے کہ نجی بشخ اکن ہنر مند بندغ آتے ودی کننگ اسہ بھلو چیلنج اس مریک۔
