اسلام آباد(پاکستان نیوز پوائنٹ 25اگست 2016ء) وزیراعظم محمدنوازشریف پارے کہ بنداوی ڈھانچہ ، توانائی و مواصلات آتا اہم ڈٹ آتیا محیط پاک۔ چین اقتصادی راہداری پاکستان ءِ علاقائی مینو فیکچرنگ محور ا س جوڑ کیک و دا براہ راست درملکی زرکاری کن بھاز پرکشش ءُ مارکیٹ اس مریک۔ او داہیت ءِ ترکی نا ”کے اوسی رڑ“ انا صدر فتح کمال ابیلی اولو تون ہیت وگپ کرسا پارے ہراک تینا ڈل اتون اوار پنچ شنبے آ وزیراعظم ہاؤس اٹی اوڑتون اوڑدہی کریر۔
وزیراعظم پارے کہ براہ راست درملکی زرکاری نا دوئی کن پاکستان نا حالیت پدریسہ گچین مننگ ءِ و سیکورٹی نا حالیت آتیٹی گچینی آن مسکوہی مسہ سال اٹی براہ راست درملکی زرکاری کن اسہ پرکشش ءُ ہند اسے نا وڑاٹ پاکستان نا پوزیشن اٹی نمان ودکی مسنے۔ ڈل انا خیر مقدم ءِ کرسا وزیراعظم پارے کہ پاکستا ن نا حکومت و الس ترکی تون تعلقداری تے بھاز اہمیت ایترہ۔
ہڑتوم آ ملک آک غٹ علاقائی و بین الاقوامی معاملہ غاتیا اسہ وڑ سوچ تخرہ۔ وزیراعظم کے او سی رڑ انا کنڈآن پاکستان نا پریمیئم ہوم اپلائنس کمپنی ڈاؤلینس دوئی کرسا پاکستان مارکیٹ اٹی پترینگ انگ نا گام انا ستاءِ کرے۔ ترکی آن توانائی ، بنداوی ڈھانچہ ، تعمیرات و خذمت آتا بشخ آتیٹی براہ راست درملکی زرکاری نا ستاءِ کرسا وزیراعظم آخبت اٹی ترک کمپنی تتون زرکاری ٹی نمان ودکی نا اومیت نا درشانی ءِ کرے۔
اوپارے کہ ننا زرکارپالیسی براہ راست درملکی زرکاری ءِ راغب کننگ کن سازگار کاروباری چاگڑد ودی کننگ نا چرجوئی ٹی جامع ڈھانچہ نا حامل ءِ۔ پاکستان نا پالیسی رجحانات آزادانہ معیشت و نجکاری آن ہم آہنگ و آسراتی تا فراوانی ءِ اولین اولیت ایترہ۔ اوپارے کہ دا ہیت است بڈءِ کہ پنی ترک کمپنیک پاکستان نا توانائی ، انفراسٹرکچر ، تعمیرات و خذمت آتا بشخ آتیٹی زرکاری ٹی است خواہی تخرہ۔
فتح کمال پارے کہ پاکستان زرکاری کن مثالی ہند اسے نا حیثیت تخک و اونا کمپنی پاکستان نامعیشت نا کیہی بشخ آتیٹی پین زرکاری کن پرعزم ءِ ۔ ڈل انا ایلو باسک آتیٹی لی وینتھ کاکیررگیو، حقان حمدی بلگر لو و صالح ارسلان تاس اوار ئسر۔ اوڑدہی ٹی وزیر خزانہ اسحاق ڈار، وزیر واپار انجینئر خرم دستگیر ، چیئرمین زرکاری بورڈ مفتاح اسماعیل و ایلو سینئر کمامدارآک ہم ساڑی ئسر۔
