اسلام آباد(پاکستان نیوز پوائنٹ 25اگست 2016ء) صدر مملکت ممنون حسین پارینے کہ برنج نا پیداوار و برآمدات آتے پین ودفنگ کن بڑزکو معیار نا برنج نا بج درستی راستی کرفنگ نا گرج ءِ تانکہ اونا خواست اٹی پین ودکی مرے۔ اوداہیت ءِ پنچ شنبے آ ایوان صدر اٹی رائس ایکسپورٹرز ایسوسی ایشن آف پاکستان نا چیئرمین محمد شفیق نا سروکی ٹی ڈل اتون اوڑدہی نا وخت آ پارے۔
صدر مملکت پارے کہ رائس ایکسپورٹرز ایسوسی ایشن آف پاکستان برنج نا بشخ انا برآمدات آتے گچین جوڑ کننگ کن گام گیج کے ہراڑآن نہ صرف برنج برآمد کنندگان آتے فائدہ مریک بلکن بزغر آک ہم اوڑآن فائدہ ہرفنگ کیرہ۔ صدر مملکت پارے کہ ٹریڈ ایسوسی ایشن کاروبار ءِ مون آ دننگ و برآمدات آتے ودفنگ کن اہم کڑد ادا کننگ کیک۔ صدر مملکت پارے کہ کاروباری و صنعتی بشخ آتے آسراتی تننگ کن حکومت نا پالیسیک سہی کنڈا ہِننگ ءُ۔
صدر مملکت پارے کہ برنج نا صنعت آ بین الاقوامی منڈی تیٹی نرخ آک کم مسنو ہراڑآن اوڑتون وابستہ خلقت آتے نسخان مسنے ولے دا بشخ اتون وابستہ خلقت آک عزم و ہمت نا درشانی ءِ کریر ہراکہ ستاکڑزرک۔ صدر مملکت پارے کہ برنج نا بشخ زرمبادلہ نا اعتبارآن پاکستان نا ارٹ میکو بھلا بشخ ءِ ہنداخاطران اونا است بڈی و اوٹی پین گچینی کن حکومت ہروڑنا گام گیج کننگ ءِ۔
صدر مملکت ڈل ءِ باوری ترفے کہ او دا بشخ اٹی گچینی و برنج نا برآمدات آتیٹی ودکی کن اونا کسر اٹی غٹ اڑاند آتا چٹفنگ اٹی کمک کینہ۔ صدر مملکت کشاری بشخ اتون وابستہ پٹ وپولی ادارہ غاتیا زور شاغسا پارے کہ برنج نا زیات و بڑزکو پیداوار کن بج درستی راستی کرفیر تانکہ زیات آن زیات فصل دوئی مرے و ملک انا معیشت سوگو مرے۔ ڈل صدر مملکت ءِ برنج نا برآمدات آتیٹی ودکی و عمدہ فصل کن تینا تجاویز تس و باسپتی برنج ءِ پیٹینٹ کننگ اٹی مشکلات آتیان ہم معلومدار کریر۔ داوخت آ ڈل ملک انا برآمدات آتا مون آ دننگ کن حکومت نا کنڈآن کروک آ گام گیج آتا صفت ءِ کرے۔
