اسلام آباد (پاکستان نیوز پوائنٹ 25اگست 2016ء) ملک اٹی توانائی نا تنکی نا چٹفنگ کن ساڑی آ حکومت نا کنڈآن جامع حکمت عملی نا رداٹ گام گیج آتا چرجوئی برجاءِ ، دا چرجوئی ٹی کیہی چنکو، نیامی و سریس وخت انا ڈٹ آتیا عمل کننگ انگ ءِ ، ٹھوس انتظامی حکمت عملی و سرسہب پالیسی تا سوب آن نہ صرف بجلی نا لوڈشیڈنگ نا وخت ءُ پاس کم مسنے بلکن بجلی نا پیداوار اٹی ہم نمان ودکی خننگانے، حکومتی گام گیج آتا نتیجہ ٹی 2018 ء اسکان 10 ہزار 4 سد میگاواٹ نا ڈٹ پورو مریرہ۔
پنچ شنبے آ وزارت ڈٹ بندی و شونتری نا کمامدارآک اے پی پی ءِ پاریر کہ وزیراعظم محمدنواز شریف تینٹ توانائی آن بابت کابینہ کمیٹی نا دیوان آتا باقاعدگی اٹ کماشی ءِ کیک و توانائی ناڈٹ آتا بارواٹی معلومداری ہلیک۔ مسکوہی اسہ سال انا وخت آ سرکاری بشخ انا شونداری پروگرام نا کمک اٹ ملک انا شون و معیشت نا سوگوی ءِ اولین اولیت آتیٹی تخنگانے، چین نا کمکاری آن بروک آ ہشت آن دہ سال اٹی 21ہزار میگاواٹ بجلی ودی کننگک۔
داسوڈیم آن 4220، دیامر بھاشا ڈیم آن 4500 میگاواٹ،نیلم ۔جہلم ہائیڈرو پاور پروجیکٹ آن 969 میگاواٹ بجلی دوئی مریک۔ داکان بیدس ایل این جی نا درآمد آن ہم 3600میگاواٹ بجلی دوئی کننگک۔ اوپاریر کہ داوخت آبپاشی نا مقصد آتے کن دیامر بھاشا ڈیم بھلو ڈٹ اسے ، تربیلاIVودیکی ڈٹ، اوچ۔IIپاور پروجیکٹ ، گدو پاور اسٹیشن نا کچ ءِ ودفنگ و گڈانی پاور پروجیکٹ کون آ ڈٹ آتا پوروی آن ملک آن توانائی نا تنکی نا ہمیش کن خاتمہ مریک۔
اوپاریر کہ حکومت 404میگاواٹ نا اوچ۔II پاور پروجیکٹ ، 747میگاواٹ نا گدو پاور پلانٹ،1320میگاواٹ ناپورٹ قاسم کول پاور پروجیکٹ ، 6 ہزار میگاواٹ نا تھر کول پاور پروجیکٹ، 1320 میگاواٹ نا ساہیوال کول پاور پروجیکٹ،1410 میگاواٹ نا تربیلاIV ودیکی ڈٹ، 3 ہزار میگاواٹ نا قائد اعظم سولر پاور و ونڈ پاور پروجیکٹس آتیان بیدس پوسکنا ڈٹ آتیا ہم کاریم کننگ ءِ۔
ہنداوڑ چشمہ یونٹ۔I، چشمہ یونٹ۔III، سی ۔III و سی ۔IV، 340 میگاواٹ نا ڈٹ آک ہم زیر تکمیل ءُ۔ اوپاریر کہ حکومت اینخو سال بجلی نا پیداوار اٹی ودکی کن سندھ اٹی توانائی نا کیہی ڈٹ آتیا 16 ارب روپئی خڑچ کیک ہرافتے ٹی کولا، شمسی و تہوآن بجلی نا پیداوار نا ڈٹ آک اوارو۔ اوپاریر کہ بنجائی حکومت نا کمک آن 2020 ء اسکان تھر انا کولاناکوڑی آن 10 ہزار میگاواٹ بجلی ودی کننگ نا ڈٹ آتیاکاریم مننگ ءِ ۔
توانائی نا ڈٹ آتیٹی ملک و درملکی زرکارآتے راغب کننگ کن سازگار چاگڑد ودی کننگ انگ ءِ۔ بنجائی حکومت 2018 ء اسکان قومی گریڈ اٹی 16564میگاواٹ بجلی اوار کننگ نا ڈٹ بندی کرینے۔ تربیلاIV ودیکی ڈٹ آن 2017 ء اسکان ودکی بجلی دوئی مننگ نا بناء مریک۔ گدو، نندی پور و قائد اعظم سولر پارک نا ڈٹ اینخو سال پیداوار نا بناءِ کیک۔ اوپاریر کہ پاک چین اقتصادی راہداری نا رداٹ ہرا ڈٹ آک2016ء ٹی تینا پیداوار نا بناءِ کیرہ اوفتے ٹی چینی کمپنی زونز جی نا بہاولپور نا خڑک 900 میگاواٹ نا سولر پاور ڈٹ ہم اوارارے۔
اوڑآن بیدس یو ای پی ونڈ نا سندھ اٹی 100 میگاواٹ نا ڈٹ، سچل و ہائیڈرو چائنا کمپنیز ناسندھ اٹی پنجا پنجا میگاواٹ نا 2 ونڈ پاور ڈٹ ہم ارے۔ کمامدارآتا رداٹ اوکان بیدس حکومت 969میگاواٹ نا نیلم جہلم پن بجلی ڈٹ انا بجلی 2016ہی ٹی نیشنل گریڈ اٹی اوار کننگ نا ڈٹ بندی کرینے۔ ساہیوال اٹی کولاآن 660 میگاواٹ بجلی ودی کننگ نا 2 ڈٹ خلنگ انگ ءِ ، ساہیوال کول پاور پروجیکٹ چین پاکستان اقتصادی راہداری نا اسہ اہم ءُ ڈٹ اسے۔ اوپاریر کہ 2017 ء ٹی دا ڈٹ آن بجلی نا پیداوار نا بناء مریک۔ حکومت نا پروگرام نا رداٹ جون 2018 ء اسکان بجلی نا جمی پیداواری لائخی 31ہزار 19 میگاواٹ مریک۔
