درملکی زرکار آتے پاکستان اٹی زرکاری نا بے پناہ وارخواہی تیان زیات آن زیات فائدہ ہرفوئی مرے

اسلام آباد(پاکستان نیوز پوائنٹ 24اگست 2016ء) صدر مملکت ممنون حسین پارینے کہ پاکستان اٹی زرکاری نا بے پناہ وارخواہی ساڑی ارے ہرافتے آن بین الاقوامی زرکار آتے زیات آن زیات فائدہ ہرفوئی مرے۔ صدر مملکت داخیال آتا درشانیءِ داڑے ایوان صدر اٹی ترک زرکارکمپنی نا اوسی ہولڈنگ نا صدر فتحی کمال ابیکلی اوگلو نا سروکی ٹی ترکی نا بھلا زرکار رڑانا ڈل اتون چارشنبے آ اوڑدہی نا وخت آ کرے۔

داوخت آ پاکستان اٹی ترکی نا سفیر صادق بابر گرگن ہم ساڑی ئس۔ صدر مملکت پارے کہ پاکستان اٹی امن و ایمنی نا حالیت بھاز گچین مسنے، حکومت پاکستان اٹی زرکاری کروک آ زرکار آتے غٹ تر آسراتی تننگ ءِ و ہندا سوب ءِ کہ بین الاقوامی زرکارآک پاکستان اٹی تینا زرءِ خلنگ ءُ ، داڑآن پاکستان نا زرمبادلہ ٹی خاصا ودکی مسنے، دا پاکستان آ پت انا درشانی ءِ۔

صدر مملکت پارے کہ پاکستان نا ترکی تون برادرانہ تعلقداری ءِ و ہڑتوم آ ملک آک ہر مشکل ساہت اٹی اسہ ایلو تون تفینو۔ اوپارے کہ ترکی نا زرکار آتے پاکستان اٹی زیات آن زیات زرکاری کروئی مرے تانکہ دا تعلقداری تیٹی پین ودکی کننگ مرے۔ اوپارے کہ ہڑتوم آ ملک آتیٹی زرکاری لائخی آن کم ءِ ہراٹی بھلو حد اسسکان ودکی کننگ مریک۔ صدر پارے کہ پاکستان اٹی بجلی نا پیداوار و جوڑ جاڑی ڈٹ آتیٹی زرکاری نا بے پناہ وارخواہی ساڑی ءِ ہراٹی ترکی نا زرکارآک تینا بشخ ءِ شاغنگ کیرہ۔

صدر مملکت ڈل آ زورشاغا کہ او ایلو زرکار آتے ہم پاکستان اٹی زرکاری نا کنڈ آ راغب کیر۔ ڈل انا سروک و کے او سی ہولڈنگ نا صدر فتحی کمال ابیکلی اوگلو صدر مملکت نا منت واری ءِ ادا کرے و اودے ترکی نا زرکار آتے پاکستان اٹی زرکاری نا کنڈ متوجوہ کننگ اٹی تینا کڑد ءِ ادا کننگ نا باوری ترفیر۔