اسلام آباد(پاکستان نیوز پوائنٹ 24اگست 2016ء) ایف پی سی سی آئی نا صدر عبدالرؤف عالم پارینے کہ وزیراعظم محمد نواز شریف نا کنڈآن برآمد کنندگان آتے سیلز ٹیکس ریفنڈ نا مد اٹی 21.44 ارب روپئی نا ادائیگی ستاء کڑزک، ہراڑآن برآمدی بشخ سوگو مریک وخت اس کہ زرکارآتا پت زیات مریک۔ ساڑی آ حکومت نا سرسہب اقتصادی پالیسیک ملک ءِ شون نا کسر آ روان کرینے ہرانا اعتراف ءِ کیہی بین الاقوامی ادارہ غاک ہم کرینو۔
عبدالرؤف عالم چارشنبے آ برجاء اسہ بیان اسے ٹی پارے کہ وزیراعظم محمد نواز شریف و وزیر خزانہ اسحاق ڈار کاروباری برادری نا حوصلہ ءِ ودفنگ کن پین گام گیج کے تانکہ او پیداوار، برآمدات و روزگار ءِ ودفسا ملکی شون اٹی تینا کڑد ءِ جوانی اٹ ادا کننگ کیر۔ اوپارے کہ ملکی معیشت شون کننگ ءِ، امن و ایمنی نا حالیت آک گچین مسنو وخت اس کہ دہشت گرد و ملک دژمن عنصر آتے کن ڈغار ءِ تنک کننگانے ہرا ساڑی آ حکومت ناکارنامہ ءِ۔ سالانہ محاصل 3100 ارب روپئی اسکان رسینگانے، لوڈشیڈنگ و افراط زر کم مننگ ءِ، حکومت نا وسیلہ وزرمبادلہ نا کوڑی ٹی ودکی مننگ ءِ، ہراہندی کرنسی سوگوی تسنے۔ ایف پی سی سی آئی نا صدر پارے کہ امن آن پیشن نا زرکاری بریک وخت اس کہ بجلی نا پیداوار ودنگ آن جی ڈی پی ودک۔
