اسلام آباد(پاکستان نیوز پوائنٹ 22اگست 2016ء) وزیراعظم نا سلاہکار انجینئر امیر مقام پارینے کہ مسلم لیگ (ن) 2018ء نا لس گچین کاری تیٹی تینا کارکڑد نا بنداو آ بھلو گیشتری اسے اٹ سرسبہی دوئی کیک۔ دوشنبے آ داڑے جاری اسہ بیان اسے ٹی او پارے کہ ساڑی آ گچین حکومت وزیراعظم محمد نواز شریف نا سروکی ٹی الس دوست پالیسی مرتب کرے و ریکارڈ شونداری کاریم کرفے دابناء آ بروک آ لس گچین کاری تیٹی پاکستان نا الس مسلم لیگ (ن) ءِ بھلو گیشتری اسے اٹ سرسہب کیرہ۔
اوپارے کہ ملک ترندی اٹ شون نا کسر آ روان ءِ ، موٹرویز و ہائی ویز آتا جوڑ جاڑ نا کاریم مچ آ ملک اٹی ترندی اٹ برجاءِ ۔ الس اٹی مسلم لیگ (ن) نا مقبولیت نا اندازہ ءِ داہیت آن خلنگ مریک کہ 7 اگست آ پشاور اٹی چنکو نوٹس اسے آ مسلم لیگ (ن) نا جلسہ ٹی الس بھلو گیشتری اسے اٹ شرکت کریر و ثابت کریر کہ خیبر پختونخواٹی مسلم لیگ (ن) مقبول ترین سیاسی جماعت ءِ۔
امیر مقام پارے کہ صوبہ خیبر پختونخوا ٹی محاذ آرائی نا سیاست و الس نا ویل آتا سوب آن خلقت آک اکتاہٹ نا گواچی ءُ۔ اوپارے کہ پشاور مسلم لیگ (ن) نا قلعہ ثابت مریک ، خیبر پختونخواہ نا صوبائی اسمبلی نا ساڑی آ ضمنی گچین کاری تا نتیجہ غاتیان وزیراعظم محمد نواز شریف نا سروکی آ حلقہ نا الس نا پت انا درشانی مریک۔ اوپارے کہ آزاد کشمیر نا لس گچین کاری تیٹی مسلم لیگ (ن) نا پبی سرسہبی آن ہم داہیت پاش ءِ کہ آزاد کشمیر نا الس منفی سیاست و بے بنداو تنقید ءِ مسترد کرینو و اوفک مسلم لیگ (ن) نا اومیت دار آتے بھلو گیشتری اسے ٹی سرسہب کرسا ننا پالیسی تا حق اٹی فیصلہ تسنو۔
اوپارے کہ پشاور شاراٹی مسلم لیگ (ن) نا ورکرآتا کنونشن زوت مریک ، مسلم لیگ (ن) نا پشاور اٹی ز وت اسہ بنجائی دفتر اس اڈتننگک ہرانا خڑچ آتے او تینٹ برداشت کیک۔
