اسلام آباد(پاکستان نیوز پوائنٹ 19اگست 2016ء) صدر مملکت ممنون حسین ءَ گشتگ انت کہ بلدیاتی گچینکاری ءَ گچین نمائندگ آنی ذریعہ ءَ مہلوک ءِ مسئلہ جہلی پڑ ءَ ھل بیت ءُُ ایشی ءَ جمہوریت سوگو بیت۔ بلدیاتی گچینکاری ءَ مردم آنی زند ءَ شری کیت ۔ صدر مملکت ءَ اے گپ جشن آجوئی ءِ سلسلہ ءَ اسلام آباد میٹرو پولیٹن ءِ بند ءُُ بست ءَ ایوان صدر ءَ بوؤکیں دیوان ءَ تران کنگ ءَ کرتگ آئی ءَ اسلام آباد ءَ بلدیاتی گچینکاری ءَ بوؤکیں میئر، ڈپٹی میئر، وائس چیئرمین ءُُ کونسلرآں بہر زرت انت۔
صدر مملکت ءَ اسلام آباد ءَ گچین بوؤکیں نمائندگ آں مبارکباتی دئیگ ءَ گشتگ کہ آ وتی فرض ذمہ واری ءُُ ایمانداری ءَ بہ دئینت ءُُ بانی پاکستان قائد اعظم محمد علی جناح ءِ اے قول کار، کار ءُُ الما کار ءِ سرا ضلور عمل بہ کن انت۔ صدر مملکت ءَ گشتگ کہ درستیں گچین نمائندگ مبارکباتی ءِ ھق دار انت کہ بنجاہی دارالحکومت ءَ اولی بار گچین بوتگ انت۔
نوں اے آھانی ذمہ واری جوڑ بیت انت کہ آ شہر ءِ براھداری ءِ ھاتر ءَ کار بہ کن انت ءُُ ایشی ءَ ھچ راہ یل مہ دئینگ ۔ صدر مملکت ءَ گشتگ کہ اسلام آباد دگنیا ءِ براھدار دارالحکومت ءَ چہ یک انت۔ آئی ءَ گشتگ کہ اگاں درستیں نمائندگ دیمروی کار ءِ سلسلہ ءَ درستیں وڑ ءَ یکجا بہ بئینت گڑا وتی محنت، لگن ءَ چہ آ اے مشکل آنی ھلاسی کرت کن انت۔ صدر مملکت ءَ گشتگ کہ کچھی آباتی ءِ جوڑ کنگ ءَ بازیں مسئلہ پیداک بوھگ ءَ انت اے مکسد ءِ ھاتر ءَ سکیں منصوبہ بندی ءِ ضلورت انت، اے ھاسیں مسئلہ ءِ نیمگ ءَ دیان دئیگ ءِ ضلورت انت۔
صدر مملکت ءَ گشتگ کہ گچین نمائندگ کرپشن ءِ ھلاسی ءِ ھاتر ءَ وتی کرد پیش بہ دار انت ءُُ وتی امور ءَ میرٹ ءُُ شفافیت ءَ بر قرار بہ دار انت۔ صدر مملکت ءَ گشتگ کہ اسلام آباد میٹرو پولیٹن کار پوریشن ءِ گچین بوؤکیں میئر شیخ انصر عزیز ءُُ دومی نمائندگ آں جشن آجوئی ءِ سلسلہ ءَ بوؤکیں دیوان ءِ سرا مبارکباتی داتگ ءُُ گشتگ کہ انچیں دیوان ءَ قائد اعظم ءِ تعلیمات ءِ سرا عمل کنگ ءِ جبزگ پیداک بیت انت۔
