کوئٹہ(پاکستان نیوز پوائنٹ 18اگست 2016ء) چین نا اسہ بڑزکو کہولی ڈل اس چین ڈرونگ نا سروکی ٹی گوادر نا دورہ غا سرمسنے ، دہ باسکی ڈل گوادر پورٹ، ایکسپریس وے گوادر فری زون، پاک چائنہ فرینڈ شپ پرائمری اسکول فقیر کالونی گوادر و ایلو ڈٹ آتا جاچ ءِ ہلکر۔ داوخت آ گوادر پورٹ اتھارٹی نا چیئرمین دوستین جمالدینی و ایڈیشنل چیف سیکرٹری داؤد بڑیچ ڈل ءِ بریفنگ ترسا پارے کہ سی پیک نا پوروی و گوادر پورٹ نا فعال مننگ آن پاکستان تون اوار مچ آ ڈیہہ ٹی گچین اقتصادی بدلی رونما مریک۔
اوپارے کہ پاکستان چین نا اشتراک آن گوادر اٹی بھاز زوت میگا ڈٹ آتیا عملدرآمد شرو ع مریک ہرافتے ٹی ایکسپریس وے نا جوڑ جاڑ تون اوار گوادر انٹرنیشنل ایئر پورٹ نا جوڑ جاڑ آ ہم کاریم اینخو سال بناء کننگک۔ ہرا تینا وڑانا پوسکن انگا ایئر پورٹ مریک۔ پاک چین تعلقداری آن گوادر تون اوار مچ آ پاکستان اٹی معاشی ، راجی و اقتصادی انقلاب برپا مریک۔
پاک چین دوستی ہمالیہ آن بڑزانگا سمندر آن بھلن و شہد آن ہنین ءِ ہڑتوم آ برادر ملک آک ہر مشکل ساہت اٹی اسہ ایلو تون تفسا مچ آ ڈیہہ ٹی اعلیٰ مثال قائم کرینو ہرادے پاکستانی الس قدر انا نظر اٹ ہرک۔ داوخت آ ڈل ءِ گوادر ڈویلپمنٹ اتھارٹی نا ڈائریکٹر جنرل ڈاکٹر سجاد حسین بریفنگ ترسا پارے کہ ادارہ شونداری گوادر اٹی کیہی شونداری ڈٹ آتیا عمل درآمد کننگ ءِ ہرافتے آن بھاز انگا ڈٹ آک پورو مسنو ہرافتے ٹی جی ڈی اے ہسپتال ، جی ڈی اسکول و ایلو ڈٹ آک اوارو۔ گوادر ماسٹر پلان آن بابت ہم ڈل ءِ سرجم احوال آتیان معلومدار کننگا۔
