اسلام آباد(پاکستان نیوزپوائنٹ 15 اگست2016ء) وزیراعظم محمد نواز شریف نا کماشی ٹی بڑزکو کہول نا دیوان اٹی بارڈر مینجمنٹ ءِ گچین وداخلی سلامتی ءِ باوری جوڑ کننگ کن سول آرمڈ فورسز آتا 29 پوسکن ءُ شاخ اڈ تننگ نا فیصلہ کننگا۔ دیوان اٹی سرکاری کمامدار و بڑزکو عسکری سروک آک شرکت کریر ہراٹی جمی داخلی سلامتی نا حالیت آتا جاچ ءِ ہلنگا۔ دوشنبے آ وزیراعظم ہاؤس نا بیان نا رداٹ دیوان اٹی فیصلہ کننگا کہ قومی سلامتی سلاہکار لیفٹیننٹ جنرل (ر) ناصر خان جنجوعہ نیشنل ایکشن پلان آ عملدرآمدی کمیٹی نا سروک مریک ہرانا ایلو باسک آتیٹی سیکرٹری داخلہ ، ڈائریکٹر جنرل نیشنل کاؤنٹرز ٹیرازم اتھارٹی ، صوبائی سیکرٹریز، انسپکٹر جنرلز آف پولیس، ہوم سیکرٹریز و وزیراعظم آفس نا ایڈیشنل سیکرٹری اوار مریرہ۔
ہر انٹیلی جنس ایجنسی آن اسہ نمائندہ اس داکمیٹی نا کمکاری ءِ کیک وخت اس کہ فوج انا نمائندگی ءِ ڈائریکٹر جنرل ملٹری آپریشنز (ڈی جی ایم او) کیک۔ دیوان اٹی دہشت گرد آتا فنڈنگ ءِ توننگ کن ساڑی آ وڑوڈول انا ہم جاچ ءِ ہلنگا و داچرجوئی ٹی گام گیج آتے پین سخت کننگ آ اتفاق کننگا۔ پارلیمنٹ نا کنڈآن ساڑی آ منظور شدہ سائبر کرائم بل ہم دیوان اٹی زیرغور بس۔
دا فیصلہ کننگا کہ داکانود نا بابت عملدرآمدی نظام زوت آن زوت اڈ تننگک۔ دیوان اٹی وزیرداخلہ چوہدری نثارعلی خان ، وزیر خزانہ اسحاق ڈار ، چیف آف آرمی اسٹاف جنرل راحیل شریف، وزیراعظم نا سلاہکار خارجہ امور سرتاج عزیز، وزیراعظم نا خصوصی کمکار خارجہ امور طارق فاطمی ، قومی سلامتی سلاہکار لیفٹیننٹ جنرل (ر) ناصر خان جنجوعہ ، ڈائریکٹر آئی ایس آئی لیفٹیننٹ جنرل رضوان اختر ، ڈی جی آئی بی آفتاب سلطان ، خارجہ سیکرٹری اعزاز چوہدری و سینئر سول و فوجی کمامدارآک شرکت کریر۔
