اسلام آباد۔(پاکستان نیوزپوائنٹ 15 اگست2016ء) وزیراعظم محمد نواز شریف ہر فورم آ کشمیری تا سیاسی ، سفارتی و اخلاقی مخ تفی ءِ برجاتخنگ ناعزم انا اعادہ ءِ کرسا پارینے کہ کشمیر اقوام متحدہ و برصغیر نا بشخ و پانٹ نا ناپورو ایجنڈہ ءِ ، پاکستان مذاکرات نا کمک اٹ کشمیر نا ویل انا پرامن ایسری نا پکا عزم تخک۔ اوداہیت ءِ آزاد کشمیر کن مسلم لیگ (ن) نا صدارتی اومیت دار مسعود خان تون دوشنبے آ ایوان وزیراعظم اٹی ہیت وگپ کرسا پارے۔
وزیراعظم جتا سفارتی عہدہ خاص کر اقوام متحدہ ٹی پاکستان نا آخبتی مندوب نا حیثیت آن کشمیر کاز ءِ تالان کننگ اٹی مسعود خان نا کڑد انا ستاءِ کرے۔ وزیراعظم مقبوضہ کشمیر اٹی بے گناہ و کودک الس آ بھارتی ریاستی ظلم و ستم نا مذمت نا اعادہ ءِ کرے۔ وزیراعظم پارے کہ مقبوضہ کشمیر نا الس نا تینا حق خودارادیت کن جہد نسل درنسل پوسکنا جوش و جوزہ تون سوگوی ہلنگ ءِ۔ مسعود خان صدر آزاد کشمیر نا عہدہ کن مسلم لیگ (ن) نا اومیت دار نا حیثیت آن تینا پنداری آ وزیراعظم نا منت واری ءِ ادا کرساپارے کہ او آزاد کشمیر نا الس نا شرحالی کن کاریم و مقبوضہ کشمیر نا منصفانہ جہد آجوئی ءِ تالان کننگ اٹی کمک کیک۔
