کوئٹہ (پاکستان نیوز پوائنٹ 09 اگست2016ء) وزیراعلیٰ بلوچستان نواب ثناء اللہ خان زہری سے شنبے آ سول ہسپتال کوئٹہ نا دورہ ءِ کرسا تدوک آدے خودکش دھماکہ ٹی ٹھپی مروک آ بندغ آتا جان پڑسی ءِ کرے و واقعہ نا جاگہ نا معائنہ ءِ کرے۔ وزیراعلیٰ بلوچستان تون اوار پشتونخواہ ملی عوامی پارٹی نا صوبائی اسمبلی ٹی پارلیمانی راہشون صوبائی وزیر تعلیم عبدالرحیم زیارتوال، نیشنل پارٹی نا صوبائی اسمبلی نا باسک حاجی اسلام بلوچ، سینیٹر سعید الحسن مندوخیل، مسکوہی اسپیکر بلوچستان اسمبلی جمال شاہ کاکڑ، ڈپٹی کمشنر کوئٹہ تون اوار ایلو بڑزکو افسرآک ہم ساڑی ئسر۔
داوخت آ صحافی تتون ہیت وگپ کرسا وزیراعلیٰ بلوچستان نواب ثناء اللہ خان زہری پارے کہ 8 اگست نا دے بلوچستان نا شاری تے کن سوگوار و افسوزناک دے اس ئسک دہشت گرد آک لغوری اٹ جلہو کرسا اسہ نسل اسے بھس کریر ولے نن حق آٹی اُن و نناحوصلہ بلند ءِ انشاء اللہ فتح ننا مریک و شہید آتا خون گم مفک۔ وزیراعلیٰ نواب ثناء اللہ خان زہری پارے کہ دہشت گرد آک بلوچستا ن نا امن ءِ بھس کننگ خوارہ ولے حکومت و کانود نافذ کروک آ ادارہ و الس نا کمک نا بدولت دہشت گرد آتا ڈٹ کر مقابلہ ءِ کینہ و صوبہ نا غٹ علاقہ غاتیٹی دہشت گرد آتا برخلاف بے پرخ و پبی کارروائی کینہ۔
اوپارے کہ کوئٹہ شاراٹی کومبنگ آپریشن نا بناءِ کننگانے و آخریکو دہشت گرد انا چٹفنگ اسکان آرام اٹ تولپنہ ۔ اسہ سوج اسے نا ورندی ٹی وزیراعلیٰ بلوچستان نواب ثناء اللہ خان زہری پارے کہ بلوچستان اٹی مروک آ دہشت گردی ٹی بھارتی اودیم ایجنسی ”را“ اوارے ۔ صوبائی وزیر داخلہ میر سرفراز بگٹی چاردے مست ”را“ انا صوبہ ٹی نیام تمنگ نا ثبوت آن میڈیا ءِ معلومدار کریسس وخت اس کہ کلبھوشن یادیو نا دزگیری بلوچستان اٹی ”را“ نا اوار مننگ نا ثبوت ءِ۔
