اسلام آباد (پاکستان نیوز پوائنٹ 09 اگست2016ء) قومی اسمبلی کوئٹہ ٹی دہشت گردی نا واقعہ نا برخلاف مذمتی قرارداد ءِ متفقہ وڑاٹ منظور کرینے ہراٹی دہشت گرد آتا برخلاف آہنی دوتے اٹ مون تننگ نا عزم انا درشانی ءِ کننگانے۔ سے شنبے آ بنجائی وزیر زاہد حامد قرارداد ءِ ایوان اٹی پیش کرے ہراٹی پاننگانے کہ کوئٹہ ٹی دہشت گردی نا واقعہ و بلوچستان بارکونسل نا صدر نا خون آ کل قوم ڈکھ و غم آن دوچار ءِ ، قرارداد اٹی تپاخت کروک آتا خاہوت آتون ہمدردی نا درشانی و ہڑزخواہی وخت اس کہ ٹھپی مروک آتا زوت جان جوڑی کن دعا کننگانے۔
قرارداد اٹی پاننگانے کہ ڈکھ انا داساہت اٹی داایوان بلوچستان نا الس، وکلاء برادری ، کانود نافذ کروک آ ادارہ غاتا کارندہ و میڈیا نا نمائندہ غاتون تفوک ءِ۔ قرارداداٹی پاننگانے کہ داایوان دننگا مذموم مسخت آتا حامل عنصر آتے شکست تننگ ودہشت گردآتون آہنی دوتے اٹ مون تننگ نا عزم انا درشانی ءِ کیک۔ داوڑنا مذموم گام گیج آک دہشت گردی نا برخلاف ننے عزم ءِ لڑزوخ کننگ کپسہ۔ قرارداداٹی پاننگانے کہ دننگا گام گیج آتیان وطن عزیز نا رکھ انا ننا عزم صمیم ءِ پین سوگو جوڑ کننگ اٹی کمک رسینگک ۔ اسپیکر قرارداد ءِ ایوان اٹی پیش کرے ہرادے متفقہ وڑاٹ منظور کننگا۔
