وزیراعظم قومی لائحہ عمل نا بارواٹی سرجمی اٹ غور اکن گیشتر ءُ دیوان اس پگہ بٹنگاانتہا پسندی و دہشت گردی نا برخلاف پبی نتیجہ غاتا دوئی کن کانود نافذ کروک آ ادارہ،

اسلام آباد (پاکستان نیوز پوائنٹ 09 اگست2016ء) وزیراعظم محمد نواز شریف انتہاپسندی و دہشت گردی نا برخلاف پبی نتیجہ غاتا دوئی کن کانود نافذ کروک آ ادارہ ، صوبائی و بنجائی حکومت نا نیام اٹ گچین کمکاری نا گرج آ زورشاغانے۔ اوداہیت ءِ چارشنبے آ وزیراعظم ہاؤس اٹی داخلی سلامتی نا حالیت و نیشنل ایکشن پلان آ عملدرآمد نا جاچ دیوان نا کماشی ءِ کرسا پارے۔

دیوان اٹی ملک انا داخلی سلامتی نا حالیت و نیشنل ایکشن پلان نا جتا پلو آتا سرجمی اٹ غور کننگا۔ وزیر داخلہ چوہدری نثارعلی خان و قومی سلامتی سلاہکار لیفٹیننٹ جنرل (ر) ناصر خان جنجوعہ وزیراعظم ءِ معلومدار کرے کہ ہراوڑ دہشت گرد تنظیمک آسان ہدف آتیا جلہو کننگ ءُ۔ دیوان اٹی نوٹ کننگاکہ فاٹا ٹی ضرب عضب نا سرسہب نتیجہ غاتا دوئی آن گڈ دہشت گرد آک محض مایوسی نا عالم اٹی داسا تینا ہدف آتے ریاستی ادارہ غاتیان ایلو کنڈ آ منتقل کرینو۔

وزیراعظم پارے کہ نن اسہ نظریہ، ہراننا طرز زند ءِ بدل کننگ خواہک، نا برخلاف حالت جنگ اٹی ءِ۔ اوپارے کہ حکومت دا ہیت ءِ باوری جوڑ کننگ کن غٹ المی گام گیج چست کیک کہ سانحہ کوئٹہ ٹی وہوک آ خون رائیگاں اِنپ۔ اوکانود نافذ کروک آ ادارہ غاتون اوار اوار صوبائی حکومت و بنجائی حکومت نا نیام اٹ گچین رابطہ غاتا گرج آ زورشاغا تانکہ چنکو وخت اسے ٹی زیات آن زیات نتیجہ دوئی مرے۔

وزیراعظم پاکستان ءِ دہشت گردی و انتہاء پسندی آن رکھوک جوڑ کننگ نا عزم انا درشانی ءِ کرے۔ او پارے کہ ملک سہی سمت اٹی روان ءِ و ہر شاری ءِ رکھوک، سوگو و شونہال پاکستان نا فائدہ غاتیان مستفید مننگ نا قابل جوڑ کننگک۔ اوپارے کہ دہشت گرد آک سمجھرہ کہ او قوم اٹی انتشار و نفاق نا بج ءِ دسنگ کیرہ ولے کل قوم پاکستانی راج آ ن دہشت گردی نا پورو چٹفنگ کن متحد و حکومت نا مخ تفی ءِ کیک۔ وزیراعظم پگہ قومی لائحہ عمل نا بارواٹی سرجمی اٹ غور اکن گیشترءُ دیوان اس خوائفنگ نا فیصلہ کرے۔ دیوان اٹی وزیر خزانہ سینیٹر اسحاق ڈار ، وزیراعظم نا سلاہکار خارجہ امور سرتاج عزیز، وزیراعظم نا خصوصی کمکار سید طارق فاطمی و ایلو سینئر کمامدار آک شرکت کریر۔