اسلام آباد(پاکستان نیوز پوائنٹ 17اپریل2017ء) وزیراعظم نا سلاہکار امور خارجہ سرتاج عزیز اوغانستان نا بگڑینگوک آ سیکورٹی حالیت آتیا پاکستان نا گڑتی نا درشانی ءِ کرسا پارینے کہ پاکستان، اوغانستان اٹی امن و مفاہمت کن کوشست آتیٹی کمکاری ناچرجوئی ٹی جہانی برادری تون اواری اٹ کاریم کننگ کن پرعزم ءِ۔ دفترخارجہ نا بیان نارداٹ سلاہکار خارجہ داہیت ءِ دوشنبے نا دے داڑے وزارت خارجہ امریکی قومی سلامتی نا سلاہکار لیفٹیننٹ جنرل ایچ آرمیک ماسٹر تون باضابطہ مذاکرات اٹی پارے۔
سرتاج عزیز ناکمکاری ءِ وزیراعظم ناخصوصی کمکار امور خارجہ سید طارق فاطمی ، قومی سلامتی ناسلاہکار لیفٹیننٹ جنرل (ر) ناصر خان جنجوعہ و وزارت خارجہ ناسینئر کمامدار آک کریر وخت اس کہ امریکی قومی سلامتی نا سلاہکار نا کمکاری ءِ امریکی سفیر ڈیوڈ ہیل،پاکستان و اوغانستان کن امریکہ نا قائم مقام خصوصی نمائندہ لارل ملر ، امریکی قومی سلامتی کونسل نا سویلی ایشیاء کن سینئر ڈائریکٹر لیز اکرٹس و پاکستان کن ڈائریکٹر جے وائز کریر۔
مذاکرات اٹی سرتاج عزیز ڈیہہ ٹی پائیدار امن نا دوئی کن گام گیج آتا بشخ انا وڑ پاکستان و اوغانستان نا نیام اٹ گچین سیمی نظام نا اہمیت ءِ تالان کرے۔ اوامریکی ڈل انا خیرمقدم ءِ کرسا پارے کہ پاکستان و امریکہ عشرہ غاتیا متکن آ سنگت آک ءُ و ڈیہہ ٹی پائیدار امن و سوگوی کن ہڑتوم آ ملک آتا نیام اٹ جاری ٹھوس شریداری المی ءِ۔ اوحکومت نا پالیسی تا بابت سرجم بریفنگ تس ہراٹی پاکستان اٹی سلامتی نا فضاء گچین مس و معاشی شونداری ءِ مون آ دننگ رسینگانے۔
دہشت گردی نا چٹفنگ ناچرجوئی ٹی اوپارے کہ دہشت گردی نا چٹفنگ نا بابت شاندار سرسہبی دوئی مسنے وپاکستان تینا گل زمین آن نیشنل ایکشن پلان نا رداٹ دہشت گردی ناپورو چٹفنگ ناعزم ءِ کرینے۔ اوپارے کہ حکومت پاکستان نا الس کن اسہ شونہال و رکھوک آخبت اسے کن سیکورٹی و معاشی محاذ آتیا کوشست آتا ساڑی آ رفتار ءِ برقرار تخنگ نا عزم کرینے۔پاکستان مقبوضہ کشمیر اٹی کشمیری تا حالیت زار آ ڈل اناتوجوہ ءِ ترفے و بھارت تون تعلقداری و حالیت آتا بابت معلومدار کننگا ، پرامن ہمسائیگی و مذاکرات کن وزیراعظم نواز شریف ناویژن نااعادہ ءِ کرسا سلاہکار خارجہ ڈل ءِ بھارت و اوغانستان تون تعلقداری تا بابت معلومدار کرے۔
امریکی قومی سلامتی ناسلاہکار وزیراعظم ناسلاہکار خارجہ امور نامنت واری ءِ ادا کرے و دہشت گردی و انتہاء پسندی نا چٹفنگ کن پاکستان ناقربانی تا اعتراف ءِ کرے۔ او تین پہ تینی مفید تعلقداری تے سوگو جوڑ کننگ و اوغانستان و ڈیہہ ٹی امن و سوگوی نااسیجائی مسخت آتا دوئی کن پاکستان تون اواری اٹ کاریم کننگ کن پوسکن آ امریکی انتظامیہ ناعزم انا درشانی ءِ کرے۔
