اسلام آباد۔(پاکستان پوائنٹ نیوز 03 -اگست 2016ء) صدر مملکت ممنون حسین ءَ گوشت کہ پاکستان ءِ سیادی گوں ترکمانستان ءَ گوں برادری اِنت، ایش ایشانی یکیں نیک راھی، دود ءُُ ربیدگ ءُُ روایات ءِ سبب اِنت۔ صدر ءِ مملکت ءَ اے ھیالانی درشانی ترکمانستان ءِ پارلیمان ءِ چیئرپرسن بانک اکجانردیوا ءِ رھشونی ءَ گل ءَ گوں چارشمبے ءِ روچ ءَ ایوان ءِ صدر ءَ گند ءُُ نند ءَ کُت اَنت۔
اے موہ ءِ سر ءَ دازرچین قومی اسمبلی سردار ایاز صادق ھم ساڑی اَت۔ صدر ءِ مملکت ءَ زور پر دات کہ دوئیں ملک آنی پارلیمانی باسک ءُُ کمیٹی آنی نیام ءَ مھکمیں ھوری ءُُ تپاکی بہ بیت۔ صدر ءِ مملک ءَ گوشت کہ دوئیں ملک آنی تجارتی حجم آوانی صلاحیت ءَ چہ کم اَنت ایشاناں گیش ودینگی اِنت۔ آئی ءَ گوشت کہ دوئیں ملک آنی نیمگ تجارت ءَ را ودینگ ءِ ھاترا المی اِنت کہ سرمایہ کار آناں آسانی ءَ ویزا دیگ بہ بیت گُڈا تجارت دیمروئی کنت۔
صدر ءِ مملکت ءَ گوشت کہ وت مہ وتی روگ ءُُ آیگ ءِ ھاترا کاروباری مردم ءُُ سیل ءُُ سوادی آنی آسراتی ءِ ھاترا بالی سروس بندات کنگ بہ بیت۔ آئی ءَ گوشت کہ ترکمانستان، اوگانستان، پاکستان، بھارت (تاپی) گیس پائپ لائن ءِ منصوبگ دمگی انرجی ءِ سلامتی ءُُ وشھالی ءِ ھاترا یک مزنیں منصوبگ اِت ءُُ پاکستان اے منصوبگ ءَ را وھد ءُُ پاس ءِ سر ءَ سرجم کنگ ءَ دلیکیم اِنت۔
