کویت سٹی(پاکستان نیوز پوائنٹ 06مارچ2017ء) وزیراعظم محمدنواز شریف پارینے کہ پاکستان اٹی درملکی زرکاری کن مثالی و سازگار چاگڑد اس ساڑی ءِ و کویت نا پوریا گر برادری پاکستان اٹی زرکاری نا وارخواہی آن فائدہ ہرفر۔ حکومت زرکارآتے ہروڑکمک و آسودہی تننگ ءِ۔ اوداہیت ءِ دوشنبے نا دے کویت نا ببیان پیلس اٹی کویت چیمبر آف کامرس نا باسک آتیا تالان اسہ ڈل اسے تون ہیت وگپ کرسا پارے۔
اہم اقتصادی سرسہبی تے تالان کرسا وزیراعظم پارے کہ ساڑی حکومت نا سخت کوشست آتیان پد معیشت بحال مسنے۔ پنی جہانی ادارہ غاک میکرو اکنامک سوگوی، جی ڈی پی گروتھ ، کم افراط زر انا کچ و اسٹاک ایکسچینج نا پوسکن آ بڑزی تیٹی پاکستان نا زبردست سرسہبی تا ستاءِ کرینو۔ اوپارے کہ حکومت بجلی نا کاختی نا معاملہ غا بھلو حد اسسکان مون ءِ تورینے، ملک انا صنعتی بشخ ءِ بلاتعطل بجلی تننگ انگ ءِ ، توانائی نا چندی بشخ بشمول، ہائیڈل ، تھرمل، کولا، شمسی و ونڈ توانائی ٹی بھلو زرکاری اس مننگ ءِ ، اوپارے کہ دا بھلا زرکاری و کنا حکومت نا ٹیم ورک آن پاکستان توانائی نا کاختی نا پورو مون ءِ تورک۔
اوپارے کہ مچ آ پاکستان اٹی انفراسٹرکچر ، موٹرویز و ایکسپریس ویز انا جوڑ جاڑ آ خصوصی چکار تخنگ انگ ءِ، چائنہ پاکستان اکنامک کوریڈور مچ آ ڈیہہ ٹی واپاری و بزنس سرجزآتیٹی ودکی نا حامل مریک۔ اوپارے کہ کوریڈور اٹی ڈیہہ نا ملک آتا خیرمقدم ءِ کننگ ءِ تانکہ او دا اہم پروجیکٹ آن فائدہ ہرفنگ کیر۔ اوڑدہی ٹی وزیر پٹرولیم و قدرتی وسیلہ شاہد خاقان عباسی، خصوصی کمکار طارق فاطمی و زرکاری بورڈ انا چیئرمین مفتاح اسماعیل ئسک ہم ساڑی ئسر۔
