کوئٹہ(پاکستان نیوز پوائنٹ 06مارچ2017ء) کامن ٹریننگ پروگرام نا ڈل ایف سی ہیڈ کوارٹر نا دورہ ءِ کرے۔ دورہ ٹی ڈل ہیڈ کوارٹر فرنٹیئر کور اٹی آئی جی ایف سی تون اوڑدہی ہمکرے۔ سرجم احوال آتارداٹ کامن ٹریننگ پروگرام نا 18باسکی ڈل آ تالان سول آفیسرز آک ہیڈ کوارٹر فرنٹیئر کور بلوچستان نا دورہ ءِ کریر۔ لیفٹیننٹ کرنل عامر آمین ڈل ءِ بلوچستان نا حالیت و فرنٹیئرکور بلوچستان نا کارکڑد آ جامع بریفنگ ترسا پارے کہ فرنٹیئر کور بلوچستان تینا بنداوی زمواری یعنی اوغانستان و ایران تون پاکستان نا سیم نا چاروکی آن بیدس سلہہ، منشیات و انسان تا غیر کانودی ہن و بر ءِ توننگ و امن و ایمنی ٹی صوبائی حکومت نا مدد، قومی میرات، شونداری ڈٹ و اہم تنصیب آتا رکھ ءِ جوان وڑاٹ پورو کننگ ءِ۔
داکان بیدس تعلیم، جان جوڑی و الس نا شرحالی نا چرجوئی ٹی ہم ایف سی بلوچستان قابل قدر خذمت سرانجام تننگ ءِ۔ الس ءِ رکھ فراوان کننگ و اوفتے تون رابطہ غاتے سوگو کننگ ایف سی نا اولیت ءِ۔ فرنٹیئر کور بلوچستان نا کنڈآن 53اسکول و 07کالج بمعہ 09 ہاسٹل مر مر انگا علاقہ غاتیٹی چناتے تعلیم نا زیورآن آراستہ کننگ ءُ۔ داکان بیدس صوبہ ٹی زمی جمب و جلاب کون آ قدرتی آفت آتیان زہمی بندغ آتا بحالی ٹی ہم فرنٹیئر کور ہمیشہ پیش پیش مسنے۔
سوج و ورندی نا سیشن اٹی آئی جی ایف سی میجر جنرل ندیم احمد انجم ڈل اتون ہیت وگپ کرسا پارے کہ شونداری و شونہالی نا سیبو امن و ایمنی تون مشروط ءِ ہنداخاطران امن و ایمنی تون اوار اوار تعلیمی شونداری و طبی آسراتی تا فراوانی ایف سی نا بنداوی اولیت آتیٹی اوار ءِ۔ گوادر نا شونداری و اقتصادی راہداری ڈٹ بلوچستان نا الس کن اسہ پوسکن ءُ دور اسے نا بناجوڑ مریک۔
اومستی پارے کہ گدرینگوک آ منہ ہفتہ ٹی 300 آن زیات کالعدم تنظیم تا فراریک ہراکہ مستین اٹی تینا چناتا رکھ انا خاطر شرپسند آتا دھڑکو تا سوب یرغمال مسوسر ریاستی عملداری ءِ امنا کرسا قومی دنگ اٹی اوار مسر۔ آئی جی ایف سی میجر جنرل ندیم احمد انجم ڈل انا ایف سی ہیڈکوارٹر نا درہ آ منت واری ءِ ادا کرے و خواست کرے کہ او تینا انفرادی حیثیت اٹی بلوچستان نا گچینی کن کڑدادا کیر۔
